Дар Донишгоҳи Осиёи Марказии Хоруғ бо иштироки раиси ВМКБ Ёдгор Файзов баҳри коҳиш додани хатари офатҳои табиӣ дар минтақаҳои кӯҳистон бо фарогирии мутахассисони ҷавон ва донишҷӯён Донишгоҳи тобистона кушода шуд. 

Донишгоҳи тобистона муддати ду ҳафта бо мақсади омӯхтани малакаву усулҳои зарурӣ барои ба таври мунтазам банақшагирӣ, амалисозӣ, назорат бурдан ва баҳо додани фаъолиятҳои идоракунии устувори ҳавзаҳои об, коҳиш додани оқибатҳои хатар, паст бурдани сатҳи осебпазирӣ аз офатҳо ва ғайра амал менамояд.

Мавриди зикр аст, ки курсҳои омӯзишии донишгоҳ дар нимаи дуввуми моҳи июни соли ҷорӣ дар Хоруғ муддати ҳашт рӯз гузашта, қисмати дуввуми он  дар ноҳияи Мӯминободи вилояти Хатлон мегузарад. Он бо ибтикори Ҳукумати кишвар дар ҳамкорӣ бо Агентии Оғо Хон оид ба макони зист, Барномаи ҷонибдории инкишофи иҷтимоии манотиқи кӯҳистон ва дастгирии Дафтари Швейтсария оид ба Ҳамкорӣ дар Тоҷикистон рӯи кор омадааст.

Донишгоҳ механизми назариявӣ ва амалиро барои муттаҳид сохтани унсурҳои илмӣ, иқтисодӣ, иҷтимоӣ, идоракунии бархӯрди Идоракунии маҷмӯии ҳавзаи дарёҳо баҳри мутобиқшавӣ ба хавфҳо ва тағйирёбии иқлим фароҳам меорад.