30 май дар Академияи илмҳои кишвар бо ташаббуси Кумитаи ҷавонон, варзиш ва сайёҳии назди Ҳукумати ҷумҳурӣ ва Шӯрои олимони ҷавони Академияи илмҳо бахшида ба “Соли ҷавонон” суҳбати мизи мудаввари телевизионӣ дар мавзӯи “Ҷалби ҷавонон ба илмҳои дақиқ: омилҳо ва натиҷаҳо” баргузор гардид.

Аҳтам Абдуллозода, раиси Кумитаи ҷавонон, варзиш ва сайёҳӣ иброз дошт, ки  айёми ҷавонӣ давраест, ки инсон қобилияти баланди амалӣ гардондани имкониятҳои зеҳнии худро дорад: “Маҳз ҳамин давра ба мо имкон медиҳад, то он ҷавҳарро, ки дар замирамон нуҳуфтааст, бо кӯшишу заҳмат ва омӯзиши пайваста кашф, татбиқ ва амалӣ созем. Дар баробари дигар чеҳраҳо имрӯз олимони ҷавон низ яке аз муаррифгарони асосии давлату миллат дар дохил ва хориҷи кишвар мебошанд. Инсон метавонад, ки бо як ихтирои худ миллатро сарфароз гардонда, давлатро дар ҷомеаи ҷаҳон шиносонад. Аз ҳамин, хотир мо бояд омилҳои ҷалби ҷавононро ба илмҳои дақиқ пайваста таҳти назорат гирем ва баҳри шароит фароҳам овардан ҷиҳати рушди онҳо дар миёни ҷавонон чораандешӣ кунем”.

Дар рафти ҳамоиш масъулини вазорату идораҳои марбута ва олимону мутахассисони ҷавони мамлакат доир ба мавзӯи ҳамоиш андешаронӣ намуданд. Таъкид шуд, ки илм дар замони муосир ҳамчун омили бисёр муҳими пешбарандаи самтҳои асосии давлатдории навини тоҷикон ба ҳисоб меравад. Пешвои миллат дар Паёми худ бевосита ба пешрафти илмҳои дақиқ таваҷҷуҳи хосса зоҳир намуда, дар ин замина баҳри фароҳам овардани шароити мусоид ҷиҳати рушди илм дар миёни ҷавонон дастуру супоришҳои мушаххас дода буданд. Чунки имрӯз иқтисодиёти мамлакатамон ва ҷомеа беш аз пеш ба рушди илмҳои дақиқ эҳтиёҷ дорад.

Дар идомаи ҳамоиши илмӣ олимону магистрони ҷавон дастовардҳои илмиашонро муаррифӣ намуда, зарурати рушди илмҳои дақиқ дар кишварро баррасӣ намуданд.