Бо ҳадафи фаҳмондани муҳтавои Паёми имсолаи Пешвои миллат муҳтарам Эмомалӣ Раҳмон ба Маҷлиси Олӣ масъулини Бахши кор бо ҷавонон ва варзиши ноҳияи Шуғнон дар ҷамоати Поршинев бо хонандагони мактаби таҳсилоти миёнаи умумии № 12 ба номи Шириншоҳ Шоҳтемур мулоқот карданд.

Зимни вохурӣ мудири бахш Аҳмад Мамадбунаев асосан толибимонро ба китобхонии бештар ва аз худ намудани фанҳои дақиқу забономӯзӣ даъват намуда, изҳор дошт, ки минбаъд онҳо дар озмунҳои ҷумҳуриявӣ аз қабили «Фурӯғи субҳи доноӣ…» ва “Тоҷикистон Ватани азизи ман” бояд фаъолтар бошанд.

Пешвои миллат низ дар Паём таъкид намуданд, ки омӯзиш ва аз худ кардани забонҳоро на барои худнамоӣ, балки бо мақсади маърифатнок гардонидани ҷомеа густариш медиҳем. Аз ин рӯ, ҳар як фарди бедордил бояд барои ғанӣ гардидани забони модарӣ ва омӯхтани забонҳои хориҷӣ кӯшиш кунад, ба мутолиаи китоб диққати аввалиндараҷа диҳад ва ҷиҳати баланд бардоштани маърифатнокии худ саъю талош намояд.Чунки тибқи таҳлилҳо вақтҳои охир дур шудан аз китобхонӣ яке аз масъалаҳои нигаронкунанда дар байни хонандагону донишҷӯён ва омӯзгорони онҳо мебошад.

Вохӯриҳо дар партави Паём дар шаҳру ноҳияҳои ВМКБ бомаром идома доранд.