Пешае, ки Беҳрӯзро дар инстаграм машҳур кард

Ҷавоне, ки ҳоло атрофаш ҳарф хоҳем зад, нафарест, ки бо видеотасвирҳои омӯзишии худ бо забони англисӣ миёни истифодабарандагони шабакаҳои иҷтимоӣ машҳур аст. Ӯ бо иҷроиши чанд нақш ба дигарон забони хориҷӣ меомӯзад. Аксаран калимаҳои лаҳҷавиро интихоб менамояд. Осону содафаҳм. Сипас, ба забони англисӣ онҳоро тарҷума менамояд.

Қаҳрамони мо видеотасвирҳои ҳаҷвӣ низ дорад. Тамошояш мекуниву беихтиёр хандаат меояд. Бо вуҷуди омӯзишӣ буданаш. Дар мавриди иҷрои нақш бошад, нақши худро хуб иҷро мекунад. Ҳамин аст, ки ба бисёриҳо писанд меояд.

Ин ҷавон Беҳрӯз Ҳафизов аст. Вақте ба суроғаш рафтем, ӯро аз маркази омӯзишии “Дунёи забон” пайдо намудем. Имрӯз дар қатори дигар блогерони “Instagram” ӯ низ бинанда зиёд дорад. Ҳамчунин тариқи интернет низ дарс медиҳад.

Ӯ то имрӯз зиёда аз 350 навори омӯзиширо тариқи “Instagram” пахш кардааст. Бо истифодаи онҳо хоҳишмандон забони англисӣ меомӯзанд. Ҳоло шумораи обуначиёнаш дар “Instagram” 120 ҳазор нафар мебошад.

То синфи нуҳум фаъолона таҳсил мекард. Падараш ӯро баъди хатми синфи нуҳ ба яке аз марказҳои таҳқиқотӣ барои кор бурд. Кору фаъолият намудан дар ин маркази таҳқиқотӣ барояш бисёр шавқовар буд. Давоми ду соли фаъолият забони русӣ ва истифодаи комили компютерро омӯхт.

Ӯ баъди хатми курси якум тасмим гирифт, ки забони англисиро омӯзад. Чун ин забонро дӯст медошт. Рӯзе бо ин мақсад назди падар ҳозир шуд. Падар ин тасмими ӯро дастгирӣ карда, баҳраш мегӯяд: “Писарам, агар забони англисиро омӯхтан хоҳӣ, ман ба ту кумак мекунам”.

Беҳрӯз баъди шунидани суханони падар бисёр шод шуд. Хурсанд буд, ки орзуяш бароварда мешавад. Қиблагоҳ барояш ҳамаи шароит-ро фароҳам овард, то ӯ ба омӯзиш машғул шавад. Ӯ низ дар ҷавоб ба ғамхориҳои хонаводааш сидқан пайи забономӯзӣ гардид.

Дар як рӯз 7-8 соат машғули омӯзиши забони англисӣ мешуд. Бидуни мондашавӣ ва хастагӣ. Шабҳо падараш аз хоб бедор мешуду писарашро медид, ки ҳанӯз нахобидаасту машғули дарсхонист.

“Ҳар калимаеро дар дафтар менавиштам чун паранда, кабӯтар, дарахт, кӯча, алаф. Баъдан онҳоро ба забони англисӣ тарҷума мекардаму аз худ менамудам. Бисёр гӯш мекардам. Филмҳо бо забони англисиро бисёр тамошо мекардам. Пайваста дафтарам дар дастам буд. Чизе менавиштам ё калимаеро ҳифз мекардам”, - мегӯяд ӯ.

Ӯ дар гурӯҳ нисбат ба дигар ҳамсабақон беҳтар мехонд. Аввалин китоберо, ки аз марказ гирифта буд, онро мустақилона дар давоми як ҳафта ба охир расонд. Инчунин чанд китобҳои дигарро низ. Бо вуҷуди фаъол буданаш нисбат ба дигарон, аз гурӯҳ набаромад. Чун онҳоро бисёр дӯст медошт. Ӯ давоми чор моҳ забони англисиро хуб омӯхту ду моҳи дигар талаффузи овозҳоро аз бар кард. Чун дар талаффуз каме мушкилӣ дошт.

Рӯзе дар дарс яке аз устодоне, ки аз хориҷа омада буд, иштирок намуд. Устод ба онҳо савол дод. Ӯ бо забони англисӣ гап задан гирифт. Устод ӯро ислоҳ накард. Баъди анҷоми дарс аз устод пурсид, ки чаро иштибоҳҳои ӯро ислоҳ накард. Устод барояш гуфт: “Гуфтори англисият хеле хуб аст”. Ин баҳои мутахассиси хориҷӣ барояш бисёр муҳим буд. Бисёр хушҳол шуд. Акнун фақат таҷриба бояд пайдо мекард.

Рӯзе устоде, ки бояд ба онҳо дарс мегузашт, намеояд. Беҳрӯз дар синф нишаста буд. Машғули дарсхонӣ. Маъмурияти омӯзишгоҳ бисёр таърифашро шунида буданд. Бинобар ин, аз ӯ хоҳиш карданд, ки ба шогирдон дарс диҳад. Аввал қабул накард. Чун таҷрибаи кофӣ надошт. Чун бисёр хоҳиш карданд, ноилоҷ розӣ шуд. Вориди синфхона гардиду ба бачаҳо салом дод. Касе ба ӯ таваҷҷуҳ накард. Шояд ба хотири оне, ки мешинохтандаш. Медонистанд, ки ӯ низ донишомӯз аст. Шуруъ кард ба фаҳмонидани дарс. Мавзуъ ҳуқуқҳои зан ва мард буд. Шогирдон бояд бо ҳам баҳс мекарданд. Чунин ҳам шуд. Баъди мазмуни дарсро ба шогирдон шарҳ додан, онҳо бо ҳам баҳс карданро сар карданд.

“Дарс бисёр шавқовар шуд. Ҳам ба ман ва ҳам ба онҳо бисёр писанд омад”, – аввалин рӯзи дарсдиҳиашро бо фараҳ ба ёд меорад, Беҳрӯз.
Ҳамин хел, оҳиста-оҳиста вориди дунёи омӯзгорӣ шуд. Он вақт дар курси дуюм мехонд. Ҳаргиз орзуи муаллим шудан надошт. Фақат англисиро омӯхтану соҳибкор шудан ва ё ба ягон давлат сафар карданро мехост. Бехабар аз оне, ки рӯзе омӯзгори хубе мешавад. Ин пешаро дӯст медорад ва идома медиҳад. Бачаҳо баъди ду дарси ӯ хостанд, ки дигар ба онҳо танҳо ӯ дарс диҳад. Онҳо назди маъмурият рафта, хостаи худро гуфтанд. Ҳамин гуна маъмурият бо ройгон намудани идомаи таҳсил дар марказ ӯро ба омӯзгорӣ ҷалб карданд.

Донишгоҳро бо ихтисоси корманди иҷтимоӣ хатм намуд. Сипас дар корхонаҳои гуногун ба фаъолият оғоз кард. Таҷриба пайдо сохт. Чанд муддат аз фаъолияти омӯзгорӣ даст кашид. Ба ҷойи он забондонии худро тақвият дод ва баргашт ба пешаи омӯзгорӣ.

Баъди талошу кӯшиши зиёду пайдо кардани малака дар худ ниҳоят моҳи августи соли 2018 маркази забономӯзии худро бо номи “Дунёи забон” боз намуд. Дар аввал барояш душвор шуд. Чун омӯзгор хеле кам буд. Аммо бо мурури вақт ин мушкилиҳо низ осон гардиданд. Имрӯз дар ин марказ толибилмони зиёде забони англисӣ меомӯзанд.

Вақте аз ӯ пурсон шудем, ки ҳадаф аз гузоштани наворҳои гуногуни омӯзишӣ дар “Instagram” чист, гуфт, танҳо мақсадаш ба дигарон ҷиҳати омӯхтани забони англисӣ кумак намудан асту халос.

Дар оянда нақшаҳои зиёде дорад. Мехоҳад малакаи касбии худро боз ҳам сайқал диҳад. Дар маркази худ аз технологияву барномаҳои нав-тарин истифода намояд.


Гулафшон КАРИМОВА,
“ҶТ”