Дар истироҳатгоҳи “Шоҳин”-и шаҳри Гулистон дар доираи лоиҳаи “Наврасон – ҳамкорон барои рушди устувор” бо ширкати 35 нафар намояндагони мақомоти иҷроияи ҳокимияти давлатӣ, мақомоти худидоракунии маҳаллӣ, бахши кор бо ҷавонон ва варзиш, омӯзгорон ва хонандагони фаъоли ноҳияҳои Деваштич ва Ҷаббор Расулов семинари омӯзишӣ доир гардид.

Сарпарастии лоиҳаи мазкурро ташкилотҳои UKAID, UNICEF ва Эҳё, фарҳанг ва тараққиёт бар ӯҳда доштанд. Дар рӯзи аввал намояндагони ширкатҳои мазкур мақсад ва вазифаҳои лоиҳаро ба иштирокчиён шарҳ доданд.

Барномаи семинарӣ барои “Баланд бардоштани иқтидори хизматчиёни давлатӣ, мақомоти худидоракунии маҳаллӣ ва наврасону ҷавонон барои рушд ва дастгирии платфома ё модел барои иштирок” бахшида шуд. Мақсад аз ин чорабинӣ баланд бардоштани савияи дониши намояндагони сохторҳои давлатӣ оид ба кор бо наврасону ҷавонон ҷиҳати иштироки онҳо дар платформа ё модел ва дастгирию рушди онҳо равона гардида буд.

Вазифаи муҳими семинар ин таъсисдиҳии модели иштироки ҷавонон, ки дар асоси он ҳамкории фаъолонаи тамоми ҷонибҳо барои қабули қарорҳои ҳаётан муҳим дар раванди иштирок имконпазир буда, таҳия намудани нақшаи кории фаъолияти платформа барои соли 2019 бо иштироки тамоми ҷонибҳои ҳавасманд ва муҳокима намудани барномаи грантӣ барои наврасону ҷавонон мебошад.

Дар давоми ду рӯз аз ҷониби Бобохон Ахмедов тамоми мавзӯъҳои лоиҳа ба иштирокчиён дар сатҳи зарурии назариявӣ ва амалӣ расонида шуда аз ҷониби ширкатдоштагон баҳои баланд гирифт.

Баҳри дар амал татбиқ намудани лоиҳаи мазкур ба ҷавонони ноҳияҳои Деваштичу Ҷаббор Расулов тавсияҳо ва маслиҳатҳои муфид дода шуд.

Лоиқ Тӯйчиев, Рухшона Рофиева ноҳияи Деваштич