Дар асоси нақша чорабиниҳои Кумитаи ҷавонон, варзиш ва сайеҳии назди Ҳукумати Ҷумҳурии Тоҷикистон, бахшида ба “Соли ҷавонон” ва ба ифтихори 20 – солагии Ваҳдати миллӣ ҳама рӯза ҷорабиниҳо байни ҷавонон гузаронида мешавад.

Чанде пеш бо роҳбарии муовини Раёсати ҷавонон, варзиш ва сайеҳии вилояти Хатлон Азиз Азимов, дар ҷамоати деҳоти 20-солагии “Истиқлол”-и ноҳияи Қубодиён оид ба пешгирии шомилшавии ҷавонон ба гурӯҳҳои ифротӣ ва даст задан ба ҷинояткории ноболиғон бо сокинон ноҳия вохӯрӣ баргузор гардид.

Дар он муовини Раёсати ҷавонон, варзиш ва сайеҳи дар вилояти Хатлон, намояндаи МИҲД-и ноҳия, шуъбаю идораҳо, роҳбарони як қатор ташкилот, фаъолон ва эмомхатибони масҷидҳо иштирок намуданд.

Дар вохӯрӣ масъулин роҷеъ ба масъалаҳои пешгирии шомилшавии ҷавонон ба ҳизбу ҳаракатҳои терроризму экстремизм, иштироки ҷавонон дар ҷангҳои кишварҳои хориҷ, амалишавии қонунҳо ва дигар масъалаҳо ибрози назар карданд.

Азиз Азимов иброз дошт: “Барои пешгирии ҷавонон аз шомилшавӣ ба гурӯҳҳои ифротӣ моро зарур аст, ки миёни ҷавонон корҳои таблиғотӣ гузаронем. Яке аз роҳҳои пешгирии онҳо паҳн кардани варақа ва китобчаҳои таблиғотӣ мебошад”.

Зимни мулоқот аз ҷавонон даъват ба амал оварда шуд, ки тамоми нерӯи хешро барои ободии марзу буми аҷдодӣ, таҳкими сулҳу субот ва ваҳдати миллӣ равона созанд.

- Ҷавонон қувваи бузурганд ва ҳар миллат дар ҳар давру замон аз ҷавонони худ ояндаи неки давлатро интизор мешавад. Аз ин рӯ, онҳо дар кадом муҳите, ки ба воя расанд, мувофиқи он дар ҷомеъа амал мекунанд. Ин аст, ки бояд ҷавонон дар рӯҳияи ватандӯстиву хештаншиносӣ ва ҳисси баланди миллӣ тарбия ёбанд, афзуд эмомхатиби масҷиди марказӣ.

Чунин вохӯрӣ дар маркази ноҳияи Ҷалолиддини Балхӣ низ гузаронида шуд.

Умед Мирзоев, "ҶТ"