Яке орзу дорад табиб шаваду муҳофизи солимии мардум. Дигаре ҳавас дорад ҳуқуқшинос бошаду ҳимоятгари ҳуқуқу озодиҳои инсон. Сеюмӣ иқтисодчӣ, муаллим, технолог ва дигару дигар. Аммо кам касонро мешиносем, ки дар дил орзу ва шавқу ҳаваси геолог шуданро дошта бошанд. Кам нафароне ёфт мешаванд, ки табиати зебо, кӯҳу табиати нотакрор, обу обанборҳои бемисли кишварро омӯхта, онро ба ҷаҳониён муаррифӣ намоянд.

Гуфтаҳои боло гӯё ба Воситҷон Фатҳуллоев тааллуқ надорад. Зеро ӯ аз он наврасону нафарони ангуштшуморе аст, ки дилбохтаи касби геология мебошад. Ӯ ҳоло хонандаи мактаб буда, дар синфи 11-и Гимназия - парваришгоҳи ба номи Бобоҷон Ғафурови ноҳияи Рӯдакӣ таҳсил менамояд. Вале ба синну соли наврасияш нигоҳ накарда, ба масъалаҳое таваҷҷуҳ мекунад, ки касро дар ҳайрат мегузорад.

Номбурда аз синфи ҳаштумияш ба мавзӯъҳои вобаста ба самти геология таваҷҷуҳ намудааст. Ӯ гуфт: “Вақте аз писараммаам дар бораи барномаи “Слёти геологони ҷавони Тоҷикистон”, ки аз тарафи Корхонаи геологии ноҳияи Рӯдакӣ ташкил карда шуда буд, маълумот пайдо кардам, дарҳол он ҷо худро номанавис намудам. Аз рӯи шартҳои барнома мо бояд тӯли се моҳ он ҷо ба таври назариявӣ дарс хондем. Баъди анҷом ёфтани дарсҳо дар Олимпиадаи 11-уми саҳрогии геологони ҷавон, ки дар осоишгоҳи “Явроз”-и дараи Ромит баргузор гардид, ширкат варзидам ва роҳхати ба Федератсия Русия сафар карданро соҳиб шудам”.

Баъд аз оне, ки ӯ соҳиби роҳхат мегардад, беҳтару бештар дониш омӯхта, дар озмуни ҷаҳонӣ, ки бо иштироки 35 даста аз ҳисоби вилоятҳои Русия ва ИДМ дар кишвари Русия баргузор гардид, ширкат меварзад. Мусобиқаи мазкур аз шартҳои геологӣ иборат буд. Гурӯҳе, ки Восит дар он шомил буд, аз намуди шарти гедроологӣ миёни ҳам сабқат намуданд. Дар ин шарт аъзоёни гурӯҳ суръат ва чуқурии обҳоро чен намуданд. Дар даври ниҳоӣ шарти ососӣ “Тавсифи ёдгории таърихии геологӣ” (Описания геологическая памятника) буд. Дар ин шарт Восит доир ба мавзеи Искандаркӯл ба аъзои ҳакамон ва иштирокчиёни озмун маълумот медиҳад. “Ҳангоме ки дар бораи Искандаркӯл нақл мекардам, ҳозирин бо диққат маро гӯш мекарданд. Зоҳиран маълум буд, ки онҳо интизор надоштанд, ки ман дар ин шарти озмун муваффақ мешавам. Вале баъди анҷоми баромад ва саволу ҷавоби ҳайати ҳакамон тавонистам соҳиби ҷойи ифтихориву диплом гардам”, - бо хушнудӣ иброз дошт Восит.

Баъди ин муваффақият Воситҷон Фатҳуллоев дуюмбора дар олимпиадаи навбатии “Геологони ҷавон” иштирок намуда, ин навбат дар мавзӯи “Ёдгориҳои геологии мавзеи кӯли Сарез, кӯҳи Малик ва шаршараи Марзич” баромад намуда, ба даври дигари озмун, ки дар шаҳри Новосибирски Федератсияи Русия баргузор мегардид, роҳхат гирифт.

“Вақте ман миёни намояндагони кишварҳои Белорусия, Муғулистон, Қазоқистон ва Русия парчами Ватани азизамонро боло бардошта ба майдон баромадам, худ аз худ ашки шодӣ рехтам, - гуфт ӯ. - Дар ҳамин лаҳзаҳои ҳассос суханони Пешвои миллатамонро, ки гуфтаанд - “Мо ба ҷавонон эътимоди комил дорем, дастгирии самимонаи онҳоро аз сиёсати пешгирифтаи давлату Ҳукумат қадрдонӣ мекунем ва нақши арзишмандашонро дар ҳамаи ҷанбаҳои ҳаёти кишвар эҳсос менамоем” ба хотирам омаду қавитару мардонавор қадам монда, ба пеш рафтам. Тоҷикистони азизро хуб муаррифӣ кардаму сазовори ҷойи намоён гардидам”.

Баъди ин дастовардҳо Воситҷон бо пешниҳоди директори мактаб – Гулноза Юсупова барои дарёфти унвони Узви Академияи хурди илми Ҷумҳурии Тоҷикистон дар мавзӯи “Сарватҳои гидроэнергетикии болооби Зарафшон дар сессияи зимистонаи соли 2019 – и Академияи хурди илми Ҷумҳурии Тоҷикистон” баромад намуда, номзад ва узви Академияи мазкур гардид. Ӯ таътили тобистонаашро дар Водии Зарафшон ва кӯҳҳои Фон барои омӯзиши ин мавзеъҳо гузаронида, моҳи майи соли 2019 дар сессияи тобистонаи Академияи хурди илми Ҷумҳурии Тоҷикистон иштирокчии фаъоли бахши “География ва экология” гашта, мавзӯи “Захираҳои гидроэнергетикии Водии Зарафшон” – ро баррасӣ менамояд. Бо ин мавзӯъ ба унвони Узви вобастаи академияи хурди илмҳои Ҷумҳурии Тоҷикистон сарфароз мегардад.

Дар ин синну соли наврасӣ Воситҷон Фатҳуллоев бо иштирок дар озмуну олимпиадаҳои гуногун ба муваффақиятҳои зиёд ноил гардидааст. Чандин лоиҳаҳои пешниҳод намудааш баррасӣ гардида, роҳи ҳалашро ёфтаанд. Чандтои дигараш ба инобат гирифта шудаасту дар оянда амалӣ хоҳанд шуд.

“93 фоизи кишвари моро кӯҳҳо ташкил дода, ин кӯҳҳо аз боигариҳои зеризаминӣ орӣ нестанд. Ман мехоҳам, ки бо аз худ кардани донишҳои лозима дар коркарди канданиҳои фоиданок дар ҳудуди кишварамон хизмат намоям,” - гуфт дар охир Восит.

Ӯ ният дорад, ки барои аз худ намудани донишҳои иловагӣ дар оянда ҳарчи бештар талош намуда, дар озмунҳои сатҳи байналмилалӣ дигар мавзеъҳои Тоҷикистони азизро ба ҷаҳониён муаррифӣ намояд. Инчунин мехоҳад, ки дар риштаи илмҳои геологӣ таҳсилашро давом дода, дар оянда мутахассиси варзидаи ин соҳа шавад.

Мо дар ин ҷода барояш бурдборӣ хоҳонем.