Дар Филармонияи давлатии Тоҷикистон ба номи Акашариф Ҷураев вакилони Иттифоқи ҷавонони Тоҷикистон баҳри пешбарӣ аз номзади худ ба мансаби Президенти Ҷумҳурии Тоҷикистон имрӯз, 31 август ҷамъ омаданд.

Ин Анҷумани XIV-уми ғайринавбатии ИҶТ буд, ки дар он раиси иттифоқи мазкур Раҳмонзода Абдулло Қурбоналӣ, вакилон аз сартосарӣ кишвар ва собиқадорони соҳаи кор бо ҷавонон ва варзиш иштирок намуданд.

Баъди пешниҳод ва тасдиқи нақшаи кори анҷуман Хусрав Бобобеков вакил аз шаҳри Душанбе аз номи Иттиҳодияҳои ташкилотҳои ҷавонони Тоҷикистон баъди баромади худ номзадии Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмонро барои номзад дар интихоботи Президенти Ҷумҳурии Тоҷикистон пешниҳод намуд. Баъдан вакилон бо намояндагӣ аз ВМКБ Сураҷ Чоршанбе, Суғд Каримзода Мирзоқосим, Хатлон Абдуллозода Фариза, шаҳри Душанбе Раҳимзода Шоҳзод баромад намуда, пешниҳоди мазкурро якдилона ҷонибдорӣ намуданд.

Аз номи варзишгарони кишвар Дилшод Назарав, қаҳрамони Бозиҳои олимпии Рео-де-жанерои Бразилия дар соли 2016, аз номи олимони ҷавон Рустам Наботӣ ва аз номи соҳибкорони ҷавони ҷумҳурӣ Дилшод Ҷураев аз номзадии Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ҷонибдорӣ намуданд.

Дар охир муроҷиатномаи вакилони Анҷумани XIV-уми ғайринавбатии ИҶТ вобаста ба пешниҳоди номзадии Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ҳамчун номзад аз ИҶТ ба мансаби Президенти Ҷумҳурии Тоҷикистон ироа ва қабул гардид.

Ёдовар мешавем, ки бори нахуст Иттифоқи ҷавонони Тоҷикистон аз аввалинҳо шуда, дар қатори дигар ташкилоту созмонҳои ҷумҳурӣ дар Анҷумани ғайринавбатии худ 17 марти соли 1994 бо намояндагӣ аз кулли ҷавонони кишвар номзадии Эмомалӣ Раҳмонро ба мансаби олии Президенти Ҷумҳурии Тоҷикистон пешниҳод ва дастгирӣ намуда буд.

Садбарг СУЯРОВА,

Рустам ОДИНАЕВ, “ҶТ”