Имрӯз, зери ин ном дар Китобхонаи миллӣ ба ифтихори Рӯзи ҷавонони Тоҷикистон Конференсияи ҷумҳуриявии илмӣ-назариявӣ баргузор гардид.

Конференсия аз тарафи Кумитаи кор бо ҷавонон ва варзиши назди Ҳукумати кишвар доир шуда, дар он Ризо Назарзода, муовини якуми раиси Кумитаи кор бо ҷавонон ва варзиш, Азиззода Шуҳрат, мушовири Бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Гавҳар Шарофзода, раиси Кумитаи забон ва истилоҳот, Бобоҷониён Раъно, муовини раиси ҲХДТ, Усмонзода Фатҳиддин, муовини вазири маориф ва илм ва олимони ҷавон иштироку суханронӣ намуданд.

Ризо Назарзода, муовини якуми раиси Кумитаи кор бо ҷавонон ва варзиш, конференсияро ифтитоҳ бахшида, кулли иштирокчиёнро ба Рӯзи ҷавонон табрик гуфтанд.

Номбурда зимни баромади хеш иброз дошт, таваҷҷуҳи беназир ва дастгириҳои наҷиби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати насли ҷавони кишвар рӯз аз рӯз афзун мегардад. Хушбахтии ҷавонони тоҷик пеш аз ҳама дар он аст, ки дар фазои сулҳу суботи комил умр ба сар бурда, баҳри амалӣ намудани сиёсати созандаи Роҳбари давлат, ки рамзи иттиҳоду сарҷамъӣ ва саодату осудагии ҳар як хонадони миллати тоҷик мебошад, камари ҳиммат бастаанд.
 
Гуфта шуд, ки пешрафти миллат бидуни саҳми ҷавонон тасаввурнопазир буда, шукуфоӣ, зебоӣ ва созандагиву беҳбудии зиндагӣ аз ҷавонон ғайрату матонати зиёдро талаб мекунад. Муҳимтарин рукни таҳкими истиқлолият ва сулҳу осоиштагӣ низ маҳз ҷавонон мебошанд. Зеро онҳо бо неруи тоза ва фикру андешаҳои нави созанда кишварро боз ҳам ободу зебо мегардонанд. Ҳар як ҷавони бонангу ори кишвар аз насли хеш, аз тоҷику тоҷикистонӣ ва меросбари ниёгони тамаддунофар буданаш ифтихор карда, ин давлатро бо заҳматҳои худ обод намуда истодаанд. Ҷавонони ояндасозро месазад, ки дар замири худ ҳамавақт фикри ояндаи миллату ватанро дошта, бо эҳсоси меҳанпарастӣ ва худшиносию худогоҳӣ ҳомии дастовардҳои истиқлолият ва марзу буми хеш мебошанд.

Иштирокчиёни дигар дар ҷараёни баромади хеш доир ба рушди ҳаёти ҷавонон дар кишвар баромад намуда, омили ба дастовардҳои беназир ноил гардидан, ҳаёту зиндагии шоистаро доро шудан ва ҳамчун насли хушбахт кору фаъолият намудану ҳамнабзи ҷавонони ҷаҳон гардидани ҷавонони мамлакатро аз дастгириҳои Пешвои муаззами миллат арзёбӣ намуданд.

Таъкид шуд, ки бояд ҷавонон идомабахши кору фаъолияти созанда дар кишвар гардида, ҳамчун пайравони асили Пешвои миллат илму дониш омӯзанд ва саҳми худро дар пешрафти ватан гузоранд.

Чорабинӣ бо қироати Суруди миллӣ аз ҷониби иштирокчиён ҳамчун рамзи садоқат ба Ватан анҷом ёфт.