Бо ташаббуси Кумитаи кор бо ҷавонон ва варзиши назди Ҳукумати ҷумҳурӣ ва Ташкилоти ҷамъиятии “Ҳамсол ба ҳамсол” имрӯз, 14 август бахшиди ба Рӯзи байналмилалии ҷавонон дар меҳмонхонаи “Ҳаят Реҷенси” таҳти унвони “Ҷавонон – пайрави Пешвои миллат”, бо иштироки васеи ташкилотҳои зертобеи Кумита, созмонҳои ҷамъиятии кор бо ҷавонон ва ташкилотҳои байналмилалӣ чорабинии фарҳангӣ-фароғатӣ баргузор гардид.

Қабл аз баргузории қисмати расмии чорабинӣ раиси Кумитаи кор бо ҷавонон ва варзиш Аҳтам Абдуллозода ва Ҳамоҳангсози доимии СММ, намояндаи доимии Барномаи рушди СММ дар Тоҷикистон Пратибҳа Маҳта аз намоишномаи баргузорнамудаи ташкилотҳои ҷамъиятию байналмилалӣ ва зерсохторҳои Кумита дидан намуданд.

Дар рафти қисмати расмии чорабинӣ раиси Кумита Аҳтам Абдуллозода зимни суханронии худ аз дастгириҳои пайвастаи Ҳукумати кишвар ва Роҳбарияти давлат ёдовар шуда изҳор дошт, ки “Дастгириҳои пайваста, таваҷҷуҳи доимии Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар тамоми самтҳои фаъолияти ҷавонон назаррас аст. Қабули Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон”, мулоқотҳои пайваста бо ин қишри ҷомеа, роҳандозии як қатор ҳавасмандгардониҳо, аз қабили стипендияҳои президентӣ, Ҷоиза ба номи Исмоили Сомонӣ барои олимони ҷавон ва як қатор дастгириҳои дигар баёнгари таваҷҷуҳи хоссаи Пешвои миллат ба ҷавонон мебошад”.

Ҳамоҳангсози доимии СММ, намояндаи доимии Барномаи рушди СММ дар Тоҷикистон Пратибҳа Маҳта дар суханрониаш эълон шудани “Соли ҷавонон”-ро амалӣ дурандешона ва хирадмандона арзёбӣ намуда, иброз дошт: “Дар тамоми дунё имрӯзҳо ба мушоҳида мерасад ва аз ҳисоботҳои оморӣ низ дақиқ аст, ки шумораи ҷавонон ба ин ҳад зиёд дар ягон давру замон набуд ва таърихи башарият ёд намедиҳад. Дастгирӣ аз ин қишри ҷомеа далолаткунандаи пешравӣ ва созандагии давлатҳост. Тоҷикистонро, ки ҳафтод фисадашро ҷавонон ташкил мекунанд, “Соли ҷавонон” эълон гардидани соли ҷорӣ аз бунёдкорию созандагӣ ва пешравӣ дарак медиҳад”.

Масъулин мақсад аз баргузории чорабинии мазкурро рушди зеҳнии ҷавонон, мустаҳкам гардидани дӯстиву рафоқат байни ин қишри ҷомеа, истифодаи самараноки нерӯи тавонбахши ҷавонон дар ободии диёр, эҳтирому арҷгузорӣ ба арзишҳои инсонӣ ва умумибашарӣ ва муттаҳидии ҷавонон зери ғояҳои ватанпарваронаву ватандӯстона арзёбӣ намуданд. Ба гуфтаи Фирӯза Раҳмонбекова, Ҳамоҳангсози ташкилоти ҷамъиятии “Ҳамсол ба ҳамсол”, чунин чорабинӣ соли 5-ум аст, ки бахшида ба Рӯзи байналмилалии ҷавонон баргузор мегардад: “Ҳадаф аз баргузории чунин як ҳамоиш асосан ҷавононро ҷалб кардан ба масъалаҳои муҳими ҷамъиятӣ мебошад. Ҳамчунин мақсади асосии баргузории чорабинии имрӯзаи мо, ки онро “Ҷавонон - сулҳовар” номгузорӣ намудем, ин тарғиб ва таҳкими сулҳу дӯстӣ миёни эшон мебошад”.

Дар доираи ҳамоиши мазкур ва дар қисмати таълимӣ-маърифатӣ, ки аз силсилачорабиниҳо иборат буд, барои иштирокчиён мастер-классҳо, сессияҳо дар мавзӯҳои “Ҷавонон ва бунёди сулҳ”, “Нерӯи таърих”, “Мубоҳиса чист?”, “Баромади оммавӣ”, “Менеҷмент дар ташкилот”, “Тарзи таҳияи ҳолнома”, “Рӯзноманигорӣ”, “Оғози соҳибкорӣ” ва “Бозии оқилон” доир карда шуд.

Дар қисмати фарҳангӣ бошад, ба иштирокчиён барномаи ҷолиби фарҳангӣ ва тӯҳфаҳои хотиравӣ тақдим гардид.

Хуршед МАВЛОН, “ҶТ”