27 январи соли ҷорӣ бо ташаббуси  Мақомоти иҷроияи маҳаллии ҳокимияти давлатии ноҳияи Рӯдакӣ дар Қасри фарҳанги ноҳия мулоқоти роҳбарияти Вазорати маориф ва илм, Кумитаи ҷавонон, варзиш ва сайёҳӣ, Мақомоти иҷроияи маҳаллии ҳокимияти давлатии ноҳияи Рӯдакӣ, шоирону нависандагон бо ҷавонони касбу кори гуногун  баргузор гардид.

Нахуст меҳмонон ва иштирокчиён аз дастовардҳои ҷавонону варзишгарони ноҳия дидан намуда, аз ҳунарҳои дастии ҷавондухтарону ҷавонписпрон аз наздик шинос гардиданд.

Дар оғоз Маҳмадраҳим Юсуфӣ, раиси ноҳияи Рӯдакӣ меҳмононро хайрамақдам гуфта, иброз дошт, ки имрӯз ҷиҳати дар амал табиқ намудани сиёсати давлатии ҷавонон дар ноҳия як қатор барномаҳо аз ҷумла “Барномаи рушди ҷавонон”, “Барномаи саломатии ҷавонон”, “Барномаи давлатии тарбияи ватанпарасстии ҷавонон” дар ноҳияи Рӯдакӣ қабул гардидаанд, ки имрӯз ҷавононро дар рӯҳияи худшиносиву худогоҳӣ тарбия намуда истодааст.

Дилноза Аҳмадзода,  муовини раиси Кумитаи ҷавонон, варзиш ва сайёҳӣ зимни суханронӣ  доир ба дастгириҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати насли ҷавон ёдовар шуда, иброз намуд, ки аз солҳои аввали ба даст овардани Истиқлолияти давлатӣ нахустин қадами устуворе, ки аз ҷониби Сарвари давлат гузошта шуд, ин қабул гардидани заминаи меъёри ҳуқуқии устуворкунандаи фаъолияти сиёсати давлатии ҷавонон дар кишвар Қонуни Ҷумҳурии Тоҷикистон “Дар бораи сиёсати давлатии ҷавонон”  аз 13 марти соли 1992 мебошад, ки ҳадаф аз қабул гардидани ин қонун  пеш аз ҳама дар оянда ба камол расонидани насли худогоҳу худшинос, ватандӯсту ватанпарвар ва соҳибмаърифату закӣ дар ҷомеъа мебошад. Дар марҳалаи минбаъдаи рушди давлатдории миллӣ боз қабул гардидани як қатор асноди меъёрию ҳуқуқӣ аз қабили “Стратегияи миллии сиёсати давлатии ҷавонон то соли 2020”, “Консепсияи миллии сиёсати давлатии ҷавонон”  ва як қатор барномаҳои соҳавӣ аз ғамхориву таваҷҷӯҳ нисбат ба ҳаёт ва фаъолияти ин қишри ояндасози кишвар аз ҷониби давлат ва Ҳукумати Ҷумҳурии Тоҷикистон аст.

“Нуқтаи аз ҳама олитарини таваҷҷӯҳ ин бо фармони дахлдори Президнти Ҷумҳурии Тоҷикистон таъсиси Шӯрои миллии кор бо ҷавонон дар назди Ҷумҳурии Тоҷикистон ва эълон гардидани соли 2017 – Соли ҷавонон мебошад. Ҷавобан ба ин ғамхориҳову таваҷҷӯҳи беназир имрӯз ҷавонони мо бо дастовардҳои назаррас, забондонӣ ва донишандӯзӣ дар пешравиву ободии ҷомеа саҳм гузошта ба Модар – Ватан содиқона хизмат карда истодаанд” – қайд намуд, Дилноза Аҳмадзода.

Ҳамчунин дар мулоқоти мазкур Латофат Назирӣ муовини Вазири маориф ва илм, шоирону нависандагон Меҳмон Бахтӣ, Гулназар Келдӣ ва Кароматулло Мирзо ба сухан баромада, доир ба сиёсати ҷавонпарваронаи Пешвои миллат, шеърҳои эҷоднамудаи хеш дар васфи Модар, Ватан, Пешвои миллат, ҷавонӣ, меҳру муҳаббат қироат намуданд.

Дар охир роҳпаймоии ҷавонон таҳти унвони “Ҷавонон – пайрави Пешвои миллат” ва намоиши фарҳангӣ дар саҳни Қасри фарҳанги ноҳия бо иштироки зиёда аз 500 нафар ҷавонон доир карда шуд.

Шералӣ Ҷалолов, "ҶТ"