Нимаи дуюми рӯзи 30-уми май, дар идораи рӯзномаи “Ҷавонони Тоҷикистон” дарси волонтёрони назди рӯзнома доир шуд.

Дар ин дарс Хуршед Мавлонов, муҳаррири шӯъбаи иттилоот ва сиёсати рӯзнома  ба волонтёрон доир ба гузоштани сарлавҳа дар хабару мақола ва умуман нақши сарлавҳа дар фаъолияти рузноманигорӣ дарс гуфта, атрофи муҳимияти сарлавҳа дар матнҳои журналистӣ андешаронӣ намуданд.

Гуфта шуд, сарлавҳа дар ҳар матни навиштаи рӯзноманигор ифодакунандаи мавзӯи мавриди назари худи ӯ буда, дар ҳар матн бояд сарлавҳаҳое гузошта шавад, ки диққатҷалбкунанда бошанду хонандаро барои мутолиаи тамоми матлаб маҷбур созад. Зеро тибқи тадқиқотҳо бештари хонандагон аввалан ба сарлавҳа эътибор дода, дар ҳолати писанд омадани он баъдан ба хондани матн шуруъ мекунанд. 

Дарс дар шакли амалӣ сурат гирифта, иштирокчиён ба хабару мақолаҳо сарлавҳа гузошта, маҳорати сарлавҳагузории худро санҷиданд ва нозукиҳои сарлавҳагузориро дар фаъолияти журналистӣ омӯхтанд.

Ёдовар мешавем, ки мақсад аз волонтёр қабул кардан дар назди рӯзнома дастгирӣ ва омода намудани рӯзноманигорони ҷавон мебошад.