ҶАВОНОН
Панҷшанбе 21 Ноябр 2019 12:14
2687
Бо мақсади ҷалби ҷавонон ба фаъолияти соҳибкорӣ, омӯзиши таҷрибаи пешқадам ва мусоидат дар рушди фаъолияти минбаъдаи онҳо, ҳамчунин андешидани тадбирҳои судманд дар ин самт рӯзи 14 апрел дар Китобхонаи миллии Тоҷикистон ба ибтикори Кумитаи давлатии сармоягузорӣ ва идораи амволи давлатӣ ва Кумитаи ҷавонон, варзиш ва сайёҳии назди Ҳукумати ҷумҳурӣ дар доираи таҷлили “Соли ҷавонон” Форуми байналмилалии соҳибкорони ҷавон таҳти унвони «Ҷавонон-муҳаррики рушди соҳибкории инноватсионӣ» бо иштироки ҳудуди 400 нафар соҳибкорони ҷавон баругзор гардид.

Форум бо суханони ёрдамчии Президенти Ҷумҳурии Тоҷикистон оид ба масъалаҳои иқтисодӣ, Ашурбой Солеҳзода оғоз гардид. Қайд карда шуд, ки дар ҷумҳурӣ амалисозии бо самари сиёсати давлатии ҷавонон аз нахустин рӯзҳои истиқлолияти давлатӣ бо дастгирӣ ва ҳидоятҳои бевоситаи Пешвои миллат, муҳтарам Эмомалӣ Раҳмон амалӣ карда шуд, ки дар натиҷа барои ҳар як фарди ҷавони мамлакат шароити мусоиду муносиб баҳри рушду такомулёбӣ ва фаъолияти онҳо фароҳам оварда шудааст: “Тоҷикистон ҳамчун кишвари соҳибистиқлол сиёсати хоси давлатии ҷавононро босамар амалӣ менамояд, ки ҳадафи он ташаккули низоми мукаммали омода намудани ҷавонони ватандӯсту ватанпарвар, дорои донишҳои муосир, содиқу вафодор, зираку ҳушёр, арҷгузоранда ба арзишҳои миллӣ ва дорои фикрронии инноватсионӣ ба ҳисоб меравад. Ҳукумати Ҷумҳурии Тоҷикистон дар баробари ташаккули заминаи меъёриву ҳуқуқии ин низом, ки бо қабули санадҳо ва амалигардонии барномаҳои гуногуни давлатӣ дар самти дастгирии ҷавонон сурат мегирад, инчунин барои фароҳам овардани инфрасохтори зарурии дастгирии ҷавонон бо роҳи ташкили институтҳои дахлдори давлатӣ ва ғайридавлатӣ пайваста талош меварзад”,- иброз дошт Ашӯрбой Солеҳзода.

Ҳамчунин қайд карда шуд, ки зери роҳбарии Пешвои миллат, муҳтарам Эмомалӣ Раҳмон фаъолият намудани Шӯрои миллии кор бо ҷавонон намунаи олии эътимоду боварӣ ба ҷавонон мебошад. Шӯрои мазкур имкон медиҳад, ки пешниҳодҳо аз ҷониби ҷавонон дастгирӣ ёфта, мушкили онҳо сари вақт баррасӣ карда шавад.

Раиси Кумитаи давлатии сармоягузорӣ ва идораи амволи давлатии ҷумҳурӣ, Файзиддин Қаҳҳорзода дар навбати худ иштирокчиёни Форумро хайрамақдам гуфта, иштироки фаъолонаи ҷавонон ва саҳми назарраси онҳоро дар рушди иқтисодию иҷтимоии кишвар, аз ҷумла бунёди корхонаю коргоҳҳои хурду миёна, муассисаҳои варзишию фароғатӣ, марказҳои омӯзишӣ ва соҳибкорӣ назаррас арзёбӣ кард. Аз ҷумла Файзиддин Қаҳҳорзода қайд кард, ки: “Тибқи маълумотҳои оморӣ айни замон 54%-и аҳолии ҷумҳурро ҷавонони то 24-сола ва аз 189 ҳазор соҳибкори инфиродӣ 51 ҳазор нафари онҳоро ҷавонон ташкил дода, ба рушди соҳибкории ҷавонон ҳамасола маблағҳои қарзӣ ва грантҳо ҷудо карда мешаванд. Ҷавонони тоҷик дар рушди таҳкими тадқиққотҳои илмию ихтироот низ ширкати фаъолона намудаанд. Дар се моҳи аввали соли 2017 дар ҷумҳурӣ 64 нафар ба руйхати навоварони наврас ва ҷавони аз 10 то 31-сола ва 41 нафар ба руйхати ихтирокорони ҷавони то 35-сола ворид карда шуд. Боиси қайд аст, ки ин раванд мунтазам густариш ёфта истодааст”.

Инчунин дар Форуми мазкур раиси Кумитаи ҷавонон, варзиш ва сайёҳии назди Ҳукумати ҷумҳурӣ, Аҳтам Абдуллозода, ҳамраиси Шӯрои ҳамоҳангсозии шарикони рушд, Роҳбари Бонки рушди Олмон оид ба саҳми ҷавонон дар рушди иқтисодӣ ва иҷтимоии Ҷумҳурии Тоҷикистон хонум Кристин Лаабс ва дигарон атрофи масъалаи рушди соҳибкории миёни ҷавонон, имкониятҳо ва монеаҳо дар фаъолияти соҳибкории ҷавонон дар кишвар, соҳибкорӣ ҳамчун омили сулҳу субот, пешрафт ва ноилшавӣ ба муваффақиятҳо дар соҳибкорӣ миёни ҷавонон суханронӣ намуданд.

Дар доираи Форум намоиши инноватсионии дастовардҳои соҳибкорони ҷавон ва ҷавонони фаъол баргузор гардид, ки меҳмонон ва иштирокчиён аз он дидан карданд.
Дар фарҷоми Форуми байналмилалии соҳибкорони ҷавон таҳти унвони «Ҷавонон-муҳаррики рушди соҳибкории инноватсионӣ» лоиҳаҳои беҳтарини тиҷоратӣ аз ҷониби ғолибони озмун муаррифӣ карда шуда, ғолибон бо ифтихорномаю ҷоизаҳо сафароз гардонида шуданд.













Хуршед МАВЛОНОВ,"ҶТ"

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 1

Ноябр 2019 c.