15 – уми ноябри соли равон бо ибтикори Клуби соҳибкорони ҷавони Кумитаи кор бо ҷавонон ва варзиши назди Ҳукумати Ҷумҳуриии Тоҷикистон дар Донишгоҳи слвянии Россия ва Тоҷикистон форуми навбатии “Start-up” G5 баргузор гардид, ки дар он соҳибкорони ҷавон сирри муваффақияти хешро ошкор намуданд.

Дар ин лоиҳа соҳибкорони ҷавони муваффақ ва спикерон аз Тоҷикистон, Қазоқистон ва дигар давлатҳо ширкат намуданд.

Гуфта мешавад, ки ин 3- юмин “Start-up” дар Тоҷикистон буда, имрӯз баргузории он аллакай ба ҳукми анъана даромадааст.

Сараввал, ректори Донишгоҳи славянии Россия ва Тоҷикистон Нуралӣ Салихов баромад намуда, иштирокчиён ва соҳибкорони ҷавонро ба муносибати 16- уми ноябр - Рӯзи Президент ва баргузории форуми навбатии “Start-up G5” табрик намуд.

Баъдан муовини директори Клуби соҳибкорони ҷавони Кумитаи кор бо ҷавонон ва варзиши назди Ҳукумати Ҷумҳурии Тоҷикистон Сулаймон Қурбонов суханронӣ намуда, иштирокчиён ва соҳибкорони ҷавонро аз номи Раиси Кумитаи кор бо ҷавонон ва варзиши назди Ҳукумати Тоҷикистон Аҳтам Абдуллозода хайрамақдам намуд.

Мавсуф изҳор дошт, ки Форуми мазкур бахшида ба 16-уми ноябр - Рўзи Президенти Ҷумҳурии Тоҷикистон баргузор гардида, боиси хурсандист, ки дар ин рўз инчунин, бо сад орзуву ҳавас агрегати аввали Нерўгоҳи барқӣ обии “Роғун” ба кор оғоз менамояд.

Соҳибкори ҷавони муваффақ, асосгузори шабакаи онлайн интернет-кафеи “Smart Saturn” ва спикер аз Қазоқистон Болатбек Оспанов, ки шабакаи ӯ дар марказҳои бузурги тиҷоратии Алма-ато ва Остона паҳн гаштааст, баромад намуда, оид ба сирри муваффақияти худ сўҳбат намуд. Номбурда гуфт, ки то имрӯз зиёда 1600 маркази савдо ба воситаи “Smart Saturn” супориш мекунанд ва мо ба онҳо пайваста хизматрасонии худро мерасонем. Ӯ гуфт, ки он супоришҳо метавонанд нақдӣ ва ғайринақдӣ бошанд.

Болатбек Оспанов оид ба фаъолияти соҳибкории худ нақл намуда, гуфт, ки то соҳибкори муваффақ шудан, мошиншӯӣ, гулфурушӣ ва ба савдо машғул буд.

Директори Клуби соҳибкорони ҷавон ва муассиси лоиҳаи “55 Групп” Дилшод Ҷураев дар рафти суханронии хеш қайд намуд, ки Клуб дар буҷети худ 1 млн сомонӣ барои дастгирии ҷавононе, ки мехоҳанд ба соҳибкорӣ машғул шаванд, ҷудо гаридааст ва онҳо омодаанд, ки ба ҳар нафаре, ки мехоҳад ба фаъолияти соҳибкорӣ машғул шавад, кӯмак намоянд.

Номбурда зикр намуд, ки қабули идеяҳо то 15 январи соли 2019 идома хоҳад ёфт.

Соҳибкори муваффақи ҷавон ва муассиси лоиҳаи интерентии “Somon.tj” Ҷаҳонгир Забиров дар навбати хеш баромад намуда, қайд кард, ки фикри ташкили лоиҳаи мазкур вақти харидани мошин амалӣ гашт.

Ӯ нақл намуд, ки бинобар дӯст надоштани бозоргардӣ бо дӯстам ба хулосае омадем, ки сомонаеро ташкил намоем, ки тариқи онлайнӣ мошинҳоро хариду фурўш намоянд. Ҳамин тариқ онҳо ба хулосае омаданд, ки сомонаи “somon.tj” – ро роҳандозӣ намоянд ва тавре мебинем он яке аз серхонанда ва пуристифодабарандатарин сомонаҳои кишвар ба ҳисоб меравад.

Ба андешаи мавсуф муваффақияти тиҷорат аслан ба команда (даста) вобаста аст ва вақте ки мо дастаи пурқувватро дар асоси боварӣ таъсис медиҳем, кор болои лоиҳа осон мешавад.

Директори Оҷонсии таблиғотии “Пурнур” Лайло Тағоева сирри муваффақияти худро дар дастаи занона будани коргарони худ медонад.

Ӯ аз набудани Институти махсуси омӯзиши таблиғотӣ изҳори нигаронӣ намуда, қайд намуд, ки мувофиқи омори Федератсияи Россия ҳамагӣ 1 % и волидайн мехоҳанд, фарзандонашон таблиғгар бошанд. Дар Тоҷикистон ин рақам боз ҳам пасттар аст.

Дар идомаи форум инчунин дигар соҳибкорони ҷавони муваффақ оид ба фаъолияти худ баромад намуда, байни ҳам мубодилаи афкор намуданд.

Баъдан ба ҳар як баромадкунанда аз номи лоиҳаи G5 туҳфаҳои махсус дода шуд ва изҳорӣ боварӣ крада шуд, ки дар оянда чунин форумҳо дар байни ҷавонони соҳибкор боз ҳам бештар гузаронида мешавад.

Садбарги РАҲМИДДИН, "ҶТ"