7-уми июл, дар шаҳри Душанбе бахшида ба “Соли ҷавонон” таҳти унвони “Татбиқ ва ҳамгироии сиёсати давлатии ҷавонон дар заминаи муассисаҳои таҳсилоти олии касбӣ”, ҳамоиши ректорони муассисаҳои таҳсилоти олии касбии кишвар доир гардид.

Раҳматулло Мирбобоев, муовини аввали вазири маориф ва илми Ҷумҳурии Тоҷикистон ҳамоишро ифтитоҳ бахшида таъкид намуд, ки “Бо пешниҳоди Пешвои миллат соли 2017 “Соли ҷавонон” эълон гардид. Дар рушду нумуи кишвари азизамон маҳз саҳми ҷавонон буд, ки дар арсаи байналмилалӣ ба дастовардҳои назаррас ноил гардидем. Дар ин давра тафаккури ҷавонони мо такмил ёфтааст. Ҳамчунин бисёр хуб аст, ки ҷавонони имрӯза донишу кобилияти худро дар илмҳои замонавӣ такмил дода, сатҳи донишашонро рӯз аз рӯз баланд бардошта истодаанд. Хушбахтона, дар шууру фаҳмиши ҷавонон зиракии сиёсӣ, худшиносии миллӣ ва ифтихори ватандорӣ хеле хуб эҳсос мегардад”.

Номбурда ҳамчунин афзуд, ки ҷавонони кишвари мо насли хушбахти даврони соҳибистиқлолии Ватани маҳбубамон маҳсуб меёбанд. Ҳукумати кишвар барои онҳо тамоми шароитҳоро муҳайё кардааст. Вобаста ба рушду ташаккули ҷавонон Пешвои миллат дар суханрониҳои худ борҳо таъкид кардаанд, ки мо бояд насли ояндасози худро дуруст ба воя расонида, наврасону ҷавононро аз таъсири ҳама гуна андешаву афкори зарарнок ва фарҳанги бегона эмин нигоҳ дорем. Пеши роҳи бесаводу бекор мондан ва таҳти таъсири гурӯҳҳои ифротӣ қарор гирифтани ҷавононро сари вақт гирем. Онҳо бояд ҳамеша зираку ҳушёр ва огаҳ аз равандҳои номатлуби ҷомеа бошанду баду некро аз ҳамдигар фарқ карда тавонанд.

Аҳтам Абдуллозода, раиси Кумитаи кор бо ҷавонон ва варзиши назди Ҳукумати кишвар, доир ба тақвият ёфтани фаъолияти шуъбаҳои кор бо ҷавонон дар муассисаҳои таҳсилоти олии касбии ҷумҳурӣ дар ҳамоҳангӣ бо фаъолияти Кумитаи кор бо ҷавонон ва варзиш суханронӣ намуда иброз дошт, ки “Дар ҷаҳони муосир рӯ овардан ба масъалаи ҷавонон ва истифода аз имкониятҳои зеҳниву ҷисмонии онҳо яке аз шартҳои ноил шудан ба инкишофи устувори давлат ва ҷомеа мебошад. Ҷавонони соҳибистеъдод ва босавод дар ҳама давру замон дар байни ҷомеа обрӯю эътибори хоса доштанд ва дар самтҳои муҳими ҳаёти ҷомеа нақши созанда мегузоранд. Бо қаноатмандӣ метавон зикр намуд, ки аз рӯзҳои нахустини соҳибистиқлолии мамлакат давлату Ҳукумати кишвар, махсусан Пешвои миллат нисбат ба насли наврасу ҷавон таваҷҷуҳи хоса зоҳир намуда, сиёсати давлатии ҷавононро яке аз самтҳои афзалиятноки сиёсати иҷтимоии Ҳукумати кишвар эътироф кард. Эълон гардидани “Соли ҷавонон” идомаи мантиқии сиёсати ҷавонпарваронаи Президенти мамлакат мебошад”.
“Яке аз қишрҳои созанда ва соҳибмаърифати ҷавононро донишҷӯён ташкил медиҳанд, ки зиёда аз 170 ҳазор нафари онҳо дар 39 муассисаи олии касбии мамлакат ба таҳсил фаро гирифта шудаанд. Кумита ҳар сол фестивали дӯстии ҷавононро барпо менамояд ва хуб мебуд, агар ҳамоиши ректорон ҳамчун як бахши фестивали дӯстии ҷавонон ҳамасола дар якҷоягӣ бо Вазорати маориф ва илми ҷумҳурӣ дар шаҳру ноҳияҳои мамлакат баргузор гардад, ки мо тавонем, дар якҷоягӣ бо омӯзиши таҷрибаи якдигар сиёсати давлатии ҷавононро ба сатҳи сифатан нав барорем ва кӯшиш кунем, ки рисолати худамонро дар назди ҷавони донишҷӯ, ки тамоми умеди мо дар оянда аз онҳо вобастааст, софдилона иҷро намоем”, - афзуд Аҳтам Абдуллозода, раиси Кумитаи кор бо ҷавонон ва варзиш.

Иштирокчиён инчунин дар мавзӯҳои “Нигоҳи нав ба фаъолияти шуъбаҳои кор бо ҷавонон дар муассисаҳои таҳсилоти олии касбии ҷумҳурӣ ва зарурати коркарди механизми фаъолияти самарабахши чунин шуъбаҳо бо истифода аз усулҳои муосири корбарӣ ва ҳавасмандӣ”, “Муаммоҳои тарбияи ҷавонон дар муассисаҳои таҳсилоти олии касбии Тоҷикистон: роҳҳои бартараф намудани мушкилоти ҷойдошта ва тақвият бахшидани фаъолияти шуъбаҳои кор бо ҷавонон дар ин самт” ва “Таъсиси ячейкаҳои ибтидоии Иттифоқи ҷавонони Тоҷикистон дар муассисаҳои таҳсилоти олии касбии кишвар омили муҳими татбиқи сиёсати давлатии ҷавонон дар муассисаҳои таълимӣ ва тақвияти фаъолияти шуъбаҳои кор бо ҷавонон” маърӯза намуда, дар идомаи ҳамоиш музокира ва саволу ҷавоб сурат гирифт.
Барномаи фарҳангӣ-фароғатӣ зери унвони “Шоми ҷавонӣ” хотимабахши ҳамоиш гардид.



Беҳрӯз ХОЛМУРОДОВ, “ҶТ”