Субҳи 8 июл як гурӯҳ ҷавонони кишвар барои аз наздик дидани НБО “Роғун” ва шинос шудан бо рафти сохтумони ин иншооти аср ба шаҳри Роғун сафар намуданд.

Сайёҳати якрӯзаи ҷавонони ҷумҳурӣ дар доираи нақша-чорабиниҳои “Соли ҷавонон” ба НБО “Роғун” бо барномаи фарҳангӣ оғоз гардид. Давлат Назрӣ, сарояндаи маҳбуби ҷумҳурӣ субҳи барвақт дар назди бинои Кумитаи кор бо ҷавонон ва варзиши назди Ҳукумати кишвар барои ҷавонон барномаи консертӣ пешниҳод намуд, ки дар он сарбозон ва ҷавонони аз манотиқи гуногуни ҷумҳурӣ ҷамъомада рақсу шодмонӣ намуданд.

Сайёҳати якрӯзаи ҷавонони ҷумҳурӣ бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Федератсияи футболи Тоҷикистон роҳандозӣ шуда, як гурӯҳ ҷавононро аз минтақаҳои гуногуни кишвар ба ҳам овард.

Дар доираи сайёҳати мазкур ҷавонони ҷумҳуриро дар даромадгоҳи ноҳияи Файзобод бо раксу суруд ва шириниҳо истиқбол намуданд.
Пеш аз ворид гардидан ба ин иншооти муҳими аср Нуриддин Файзалиев, сардори Раёсати назорати техникӣ дар НБО “Роғун” оиди таърихи иншоот ва барои мардуми тоҷик то чӣ андоза муҳим будани ин иншооти стратегӣ мухтасар маълумот дод.

Зимни сайёҳати якрӯза ҷавонони ҷумҳурӣ аз мавзеҳои муҳиму асосии иншооти бузурги аср – НОБ “Роғун” дидан намуданд. Сараввал ҷавонон аз тунели эҳтиётии обпарто дидан намуда, бо родмардони тоҷик, ки бо дасту дили гарм ва ҳувияти тоҷикона дили кӯҳро мешикофтанд, суҳбати озод намуда ба саволҳои худ ҷавоби мушаххас пайдо намуданд.

Гуфта шуд, ки тунели эҳтиётии обпарто 15 метр баландӣ ва 1800 метр дарозӣ дошта, ғафсии девори бетонии он ду метр мебошад. Барои сохта шудани тунели мазкур кормандонро зарур омадааст, ки 6 киломерт тунели зеризаминӣ канда, шароити кории мусоит фароҳам оваранд. Барои мустаҳкам гардидани деворҳои мазкур ва амнияти кормандон, родмардони тоҷик бо сим ва арматурҳои махсус қабатҳои заминро бо деворҳои тунел духтаанд, ки барои ҷавонон бисёр ҳайратовар буд. Таъкид гардид, ки ашёҳои истифодашудаи нерӯгоҳ аз муоинаи техникӣ гушатааст ва иншооти мазкур баъди ба истифода додан то 150 сол барои хидмат ба мардуми тоҷик кафолат дода мешавад.

Дар доираи сайёҳат ҷавонони кишвар доир ба мавзеҳои асосии ин иншооти стратегӣ маълумоти мусаххас гирифта, бо таассуроти зиёд баргаштанд.

Садбарг Раҳимова, донишҷӯи соли чоруми Колеҷи тиббии ҷумҳуриявӣ баъди боздид аз иншооти мазкур чунин андеша намуд: “Пеш аз ҳама, диққати маро кормандони иншооти мазкур ҷалб намуд. Ҳар яки онҳо бо як ҳисси баланди ватандӯстӣ арақи ҷабин мерезанд, ки инро дар чеҳраи онҳо мушоҳида кардан мумкин аст. Ин ҳисси ватандӯстии онҳо дар ниҳоди ман эҳсоси миллию худшиносиро дучанд намуд. Воқеан, “дасти инсон гул аст “ мегӯянд, хато нест. Имрӯз мо шоҳиди ин гуфтаҳо шудем ва бо як ҷаҳон таассурот баргаштем”.

Муҳаммад Умаров, сарбози қатории 08010: “Ман хушбахт аз он ҳастам, ки имрӯз ба ман муяссар гашт, то иншооти муҳиму тақдирсози миллати азизамро аз наздик бинам. Аз ин пеш вақте тариқи телевизиону матбуот дар бораи НБО “Роғун “ мегуфтанд, орзу мекардам, ки аз назик инро бубинам. Ин шарафи бузург ҳангоми адои хизмати Модар-Ватан ба ман мушарраф гашт. Баъди боздид ба хулосае омадам, ки саҳм гузоштан дар ин иншооти аср қарзи ҷонию виҷдонии ҳар як шаҳрванди Ватан аст. Мо шоҳиди он гаштем, ки кормандони ин иншоот баҳри нур ҳадия кардан ба миллати худ заҳмат кашида, дили кӯҳро мешикофанд, ки ин кори мардонагист. “Мардуми тоҷик созанда аст”, мегӯянд. Далели ин гуфтаҳоро мо дар сохтмони НБО “Роғун” дида метавонем ”.

Муҳсин Муродзода: “Сараввал миннатдории кулли ҷавонони ҳузурдоштаро ба президенти Федератсияи Футболи Тоҷикистон Рустами Эмомалӣ мерасонам. Онҳо мусоидат намуданд, ки ҷавонон аз ин иншооте, ки ҳайёту мамоти Тоҷикистон дар он аст, дидан намоянд. Воқеан, аз ин сафар мо - ҷавонон таассуроти баланд бардоштем. Банда факултети энергетикии Донишгоҳи техникии Тоҷикистонро хатм намудам. Дар равиши дарсҳо мо танҳо ҷиҳатҳои назариявии нерӯгоҳи мазкурро омӯхта будем. Имрӯз барои ман як дарси хуб шуд, ки донишҳои назариявӣ андухтаи худро дар амал дидам. Умед дорам, ки НБО “Роғун” дар оянда барои пурзур намудани риштаҳои иқтисодии кишварамон саҳм мегузорад ва баъди истифода додани як агрегати он, мо метавонем истиқлолияти энергетикии худро ҷашн гирем. Дар ҳоли пурра ба истифода додани НБО “Роғун” Тоҷикистон метавонад, яке аз давлатҳои содиркунандаи асосии нерӯи барқ дар Осиёи Марказӣ бошад ва мо - мардуми тоҷик дар якҷоягӣ ин иншооти тақдирсозро месозем”.

Амир Иброҳимов, корманди Кумитаи кор бо ҷавонон ва варзиш: ”Сайёҳати ҷавонон ба иншооти аср дар доираи нақша - ҷорабиниҳои “Соли ҷавонон” рост омад ва баъди боздид аз иншооти мазкур аз чеҳраи ҳар як ҷавонони ҳузурдошта пайдо мекунем, ки онҳо бо як таассуроти баланд баргаштанд. Ҳангоми вориди иншооти НБО “Роғун” гардидан ҷавонон хоҳиш карданд, савора нею пиёда сайёҳат намуда, аз нозукиҳои иншооти мазкур пурра дидан намоянд. Мушоҳида мешуд, ки кормандони иншооти мазкур бо як ҳисси баланди худшиносӣ баҳри ободии диёр содиқона талош мекунанд, ки барои мо – ҷавонон як дарси ибрат буд. Орзуи ман буд, ки аз агрегатҳои НБО “Роғун” дидан намоям ва имрӯз ин орзуи ман амалӣ гашт. Сайёҳати мо ки дар “Соли ҷавонон” рост омад, натанҳо барои ман, балки барои тамоми ҷавонони ҳузурдошта як саҳифаи хотирмони ҳаёт мешавад. Ман аз номи худ ба тамоми кормандони НБО “Роғун” муваффақият таманно мекунам ва умедворем, ки ҳарчи зудтар бо сифати баланд ин иншооти аср сохта ба истифода дода мешавад ва кори мардуми тоҷик намунаи ибрат баҳри оламиён мегардад”.

Шодихони НАЗАР, “ҶТ”