Дар Мактаби президентӣ барои хонандагони болаёқат дар шаҳри Бӯстон санаи 13-уми август ҳамоиши гирандагони Стипендияи Президенти Ҷумҳурии Тоҷикистон таҳти унвони “Ҷавонон-пайрави Пешвои миллат" таш баргузор гардид.

Дар ҳамоиш Абдулло Раҳмонзода - раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Зайнура Азимӣ - муовини раиси вилояти Суғд, Мирзоқосим Каримзода - сардори Раёсати кор бо ҷавонон ва варзиши вилояти Суғд ва роҳбари муассисаи мазкур иштирок ва суханронӣ намуданд.

Сараввал муовини раиси вилояти Суғд Зайнура Азимӣ зимни суханронии худ гирандагони Стипендияи Президенти Ҷумҳурии Тоҷикистонро табрик намуда, аз дастовардҳои ҷавонон ва саҳми онҳо дар пешрафти ҷомеа ёдовар шуд.

Сипас, Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон баромад намуда, иброз дошт, ки “сиёсати давлатии кор бо ҷавонон дар меҳвари сиёсати Асосгузори сулҳу ваҳдати миллӣ – Пешвои муаззами миллат, муҳтарам Эмомалӣ Раҳмон қарор дошта, барои татбиқи босамари сиёсати давлатии кор бо ҷавонон мо вазифадор ҳастем. Таъсис ёфтани Стипендияи Президенти Ҷумҳурии Тоҷикистон барои наврасону ҷавонон намунаи олии таваҷҷуҳи Пешвои муаззами миллат нисбат ба насли ояндасози кишвар буда, барои ҳавасманд намудани насли ҷавон ҷиҳати ба таҳсилоти муносиб фаро гирифтани онҳо ва ташаккул додани маҳорат ва малакаю истеъдоди онҳо мусоидат менамояд”.

Пас аз суханронӣ аз ҷониби меҳмонон маблағҳои ҷудогардида аз Фонди махсуси Президенти Ҷумҳурии Тоҷикистон ба ҳар як гирандаи Стипендияи президентӣ тақдим гардид.

Ёдовар мешавем, ки гирандагони Стипендияи Президенти Ҷумҳурии Тоҷикистон дар вилояти Суғд 95 нафарро ташкил медиҳад.

Ш. НУРМАТОВ, “ҶТ”