Бахшида ба Рӯзи ҷавонони Тоҷикистон дар Кохи фарҳанги ба номи Абӯабдуллоҳ Рӯдакӣ мулоқоти Раиси вилояти Суғд Раҷаббой Аҳмадзода бо устодону донишҷӯёни Донишгоҳи давлатии Хуҷанд ба номи академик Бобоҷон Ғафуров баргузор гардид.

Нахуст Раиси вилоят дар даромадгоҳи Кохи фарҳанги ба номи Абӯабдуллоҳ Рӯдакӣ аз намоиши дастовардҳои устодону донишҷӯёни донишгоҳ боздид намуд.

Зимни мулоқот бо устодону донишҷӯёни донишгоҳ Раиси вилоят аз дастгириҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати ҷавонон ёдовар шуда, зикр намуд, ки бо сиёсати маорифпарваронаи Пешвои миллат давоми солҳои соҳибистиқлолӣ шумораи муассисаҳои олӣ ва миёнаи касбӣ афзуда, ҳазорон нафар соҳибтахассус шудаанд. Дар ин радиф, саҳми Донишгоҳи давлатии Хуҷанд ба номи академик Бобоҷон Ғафуров низ дар омодасозии кадрҳо назаррас мебошад. Донишгоҳи давлатии Хуҷанд аз зумраи бонуфузтарин донишгоҳҳои олии кишвар ба шумор меравад ва дар он наздик 20 ҳазор донишҷӯён дар 76 кафедра аз рӯи 74 ихтисос таҳсил мекунанд.

Дар Донишгоҳи давлатии Хуҷанд ба номи академик Бобоҷон Ғафуров имрӯзҳо 850 нафар омӯзгорон, ки 45 дарсади онҳо соҳиби унвонҳои илмӣ мебошанд, ба таълиму тарбияи насли ҷавон машғуланд. Раиси вилоят аз фаъолияти пурсамари устодони донишгоҳ ёдовар шуда, дастовардҳои донишҷӯёнро самараи меҳнати устодон арзёбӣ кард.

Дар идомаи мулоқот чанде аз устодону донишҷӯёни донишгоҳ сухан гуфта, барои дастгириҳои ҳамешагӣ ба Пешвои миллат муҳтарам Эмомалӣ Раҳмон изҳори сипос намуданд.

Баъд аз анҷоми мулоқот аз ҷониби Раиси вилоят ба 30 нафар донишҷӯёни фаъоли донишгоҳ тӯҳфаҳои молиявӣ тақдим гардид ва сипас аз ҷониби донишҷӯён барномаи фарҳангӣ пешкаши ҳозирин гардонида шуд.