Имрӯз дар муассисаи таҳсилоти миёнаи умумии №6-и ноҳияи Исмоили Сомонӣ бахшида ба Рӯзи байналмилалии ҷавонон чорабинии идона баргузор гардид.

Дар чорабинии мазкур раиси Кумитаи кор бо ҷавонон ва варзиш, сардори Раёсати кор бо ҷавонон ва варзиши шаҳри Душанбе, гирандагони Стипендияи президентӣ, гирандагони стипендияи раиси шаҳри Душанбе, ғолибони олимпиадаҳои фаннӣ ва кормандони касбу кори гуногун иштирок намуданд.

Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни ифтитоҳи чорабинӣ нахуст кулли иштирокчиёнро ба Рӯзи байналмилалии ҷавонон таҳният гуфта, иброз дошт, ки маҳз ҷавонони фаъол метавонанд, дар пешрафту нумуи ватани азизамон саҳмгузор бошанд.

Номбурда дар идома таъкид намуд, “Шумо барои худатон хонед, ҳамин тавр зиндагиятон хуб мешаваду давлату ҷомеа низ пеш меравад. Зеро хондан ин роҳи наҷот аст, роҳ сӯйи зиндагии шоисата аст, роҳ ба сӯйи хушбахтист, роҳ ба сӯйи шинохти арзишҳои миллӣ ва роҳ ба суйи манфиатҳои миллист. Имрӯз барои ҳавасмандиҳои шумо дар роҳи илмомӯзӣ Стипендияи президентӣ ва стипендияи раиси шаҳри Душанбе таъсис ёфтааст. Аз ин имкониятҳо самаранок истифода баред”.

Сипас, раиси Кумитаи кор бо ҷавонон ва варзиш ба гирандагони стипендияи раиси шаҳри Душанбе шаҳодатноми стипендияи роҳбарияти пойтахтро супорида, инчунин ба ғолибони олимпиадаҳои фаннӣ ва ҷавонону волонтёрони шаҳри Душанбе барои иштироки фаъолонаашон дар корҳои ҷамъиятӣ сипоснома тақдим намуданд.

Дар охир консерти идона пешниҳод гардид.