МУАЛЛИФ: ХУРШЕД МАВЛОН

Бахшида ба “Соли ҷавонон” бо иқдоми Кумитаи ҷавонон, варзиш ва сайёҳӣ имрӯз, 24 феврал, дар Филармонияи давлатии Тоҷикистон Фестивали ҷумҳуриявии “Таронаи сарбоз” баргузор шуд.



Зимни ифтитоҳи чорабинӣ раиси Кумитаи ҷавонон, варзиш ва сайёҳӣ Аҳтам Абдуллозода афсарону сарбозонро ба 24-уми солгарди таъсисёбии Артиши миллӣ табрик намуда, изҳор дошт:

- Ҳарчанд, ки Артиши миллии мо дар вазъияти бисёр вазнини сиёсии кишвар таъсис ёфт, вале дар натиҷаи тадбирҳои мунтаззам андешидаи Ҳукумати мамлакат, бахусус Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ, муҳтарам Эмомалӣ Раҳмон марҳила ба марҳила устувору пурқувват гардида, имрӯз бо мутахассисони дорои донишу маллакаи баланд, техникаву таҷҳизоти муосир таъмин мебошад.



Гуфта шуд, мақсад аз баргузории чунин як чорабинӣ баланд бардоштани ҳисси ватандӯстию меҳанпарастӣ, маърифати сиёсӣ ва ҳуқуқии ҷавонон, эмин нигоҳ доштани онҳо аз ҳар гуна хатарҳои замон, ҳидоят ёфтани онҳо ба бунёдкорӣ ва созандагии кишвар ва дар дилашон бедор кардани ҳисси миллӣ ва дӯст доштани арзишҳои фарҳангӣ мебошад.

Кумитаи ҷавонон, варзиш ва сайёҳӣ бо ин мақсад ҳар сол фестивалҳои ҷумҳуриявии “Таронаи сарбоз”, “Гулчини сурудҳои ватандӯстона” ва “Навои Ватан”-ро доир мекунад.



Дар фестивал аз тарафи ҳунармандони ҷавон сурудҳо дар васфи Ватан, Тоҷикистон, марзу бум ва саҳнаҳои театрӣ пешниҳод гардид.

Дар фарҷом беҳтарин сурудҳои ватандӯстона соҳиби “Сипоснома” ва тӯҳфаҳои хотиравӣ гардиданд.