Дар маркази ноҳияи Тоҷикобод санаи 22 апрел, мулоқоти Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва гурӯҳи кории вазорату идораҳои кишвар бо ҷавонони касбу кори гуногун, гирандагони Стипендияҳои президентӣ, мураббиёну варзишгарон, собиқадорони ҷангу меҳнат ва фаъолони ноҳия доир шуд.

Маҳмадшозода Ҳамидулло, раиси ноҳияи Тоҷикобод нахуст меҳмононро ба ноҳия хайрамақдам намуда, иброз доштанд, ки баъди ба даст овардани Истиқлолияти давлатии Ҷумҳурии Тоҷикистон ин ноҳияи дурдасттарини кишвар ба яке аз ноҳияҳои пешрафта табдил ёфта, соҳаҳои гуногуни хоҷагии халқ ба маротиб пеш рафта истодааст. Дар ноҳияи Тоҷикобод бо дастгириҳои пайвастаи Пешвои маҳбуби кишвар, муҳтарам Эмомалӣ Раҳмон тамоми самтҳои хоҷагии халқ ва инфрасохтори зарурӣ бунёд гардида, сол то сол шароити зиндагӣ ва таҳсили муносиб барои сокинони ноҳия фароҳам гардидааст.

Аҳтам Абдуллозода, раиси Кумитаи кор бо ҷавонон ва варзиш зимни суханронии хеш иброз намуданд, ки дар доираи сиёсати ҷавонпарварона ва варзишпарваронаи Президенти Ҷумҳурии Тоҷикистон, муҳтарам Эмомалӣ Раҳмон дар зарфи 27 соли соҳибистиқлолии кишвар дар ҳудуди ноҳияи Тоҷикобод даҳҳо иншоотҳои хурду бузурги варзишӣ бунёд гардида, инфрасохтори зарурӣ барои ҷавонону навсарон ҷиҳати таҳсил ва шароити  арзанда фароҳам оварда шудааст.
 
Гуфта шуд, ки ҷавонон дар баробари фароҳам овардани шароити мусоид бояд зираку ҳушёр бошанд, илмҳои замонавиро аз худ намуда, дар донишгоҳҳои олии кишвар ба таҳсили илм фаро гирифта шаванд. Ҷавонон метавонанд, бо донишу маҳорат ва малакаю истеъдод арзишҳои бузурги миллӣ ва дастовардҳои даврони соҳибистиқлолии кишварро ҳимоя намоянд.