Кӯдакони ятиму бепарастори мактаб-интернати ноҳияи Қубодиён, дар чаҳорчӯби барномаҳои бахшида ба "Соли ҷавонон" соҳиби туҳфаҳои хотиравӣ шудаанд.

Филиали Иттифоқи ҷавонони Тоҷикистон дар вилояти Хатлон бо дастгирии Кумитаи ҷавонон, варзиш ва сайеҳии назди Ҳукумати Ҷумхурии Тоҷикистон, дар мактаб-интернати ноҳияи Қубодиён бахшида ба "Соли чавонон" ва 20 - солагии Ваҳдати миллӣ чорабинии фарҳангӣ-фароғатӣ доир намуданд.

Дар чорабинӣ сардори Раёсати ҷавонон, варзиш ва сайёҳӣ дар вилояти Хатлон Фариза Абдуллозода, муовини раси ноҳияи Қубодиён Тоҷинисо Шарифова ва омӯзгорони мактаб-итернат иштирок намуданд.

Фариза Абдуллозода иброз намуд, ки "Ятимон ҳамеша таҳти сарпарастии Ҳукумати мамлакат қарор доранд ва ҳадафи асосии сиёсати иҷтимоии давлат ин фароҳам овардани шароит барои зиндагӣ ва таҳсили шоистаи ятимону маъюбон мебошад".

Ӯ дар ҳузури мардум иброз дошт, ки ҳар як хонандаи мактаб барои роҳбарияти мамлакат азиз мебошад, хусусан Пешвои миллат дар мулоқоту вохӯриҳо, ки ятимонро мебинад аввал сари онҳоро сила мекунад.

Дар толори ин мактаб-интернат ба ҳамаи тарбиятгирандагон, ки 68-нафаро ташкил медиҳанд, аз ҷониби Филиали Иттифоқи ҷавонони Тоҷикистон ва Раёсати ҷавонон, варзиш ва сайёҳи вилояти Хатлон туҳфаҳои хотиравӣ, аз ҷумла сарулибоси варзишӣ, туби валейбол, шириниҳо такдим намуданд.

Умед Мирзоев, "ҶТ"