МУАЛЛИФ: УМЕД МИРЗОЕВ

Бо ибтикори Бахши ҷавонон, варзиш ва сайёҳӣ ва шуъбаи кор бо занон ва оилаи ноҳияи Восеъ ба ифтихори “Соли ҷавонон” ва ҷашни Наврӯзи байналмилалӣ озмуни «Маликаи Наврӯз» баргузор шуд.

Дар он 20 духтари ҷавон он ҷамоатҳои деҳоти ноҳия иштирок карданд.

Ҳадафи асосии баргузории озмун тарбияи ҷавондухтарон дар рӯҳияи расму оинҳои миллӣ, рафтору гуфтор ва одобу русуми оиладорӣ, эҳёи ҳунару анъанаҳои миллӣ, пухтапази таомҳои миллӣ ва зебопарастӣ будааст.

Ҳафиза Сафарова, мудири шуъбаи кор бо занон ва оилаи ноҳияи Восеъ гуфт: “Озмун аз рӯи панҷ шарт - суруд, намоиши либоси миллӣ, санҷиши зеҳнӣ, саволу ҷавоб оид ба суннатҳо ва анънаҳои Наврӯз ва қироати шеър дар васфи «Баҳор» ва «Наврӯз» иборат буд”.

Ҳайати ҳакамон ба маҳорати ҳунарии ҳамаи гулдухтарон баҳои баланд дода, ҷойи якумро ба хонандаи Литсейи касбӣ-техники ноҳия Ҳусния Сайдалиева сазовор донистанд. Ҷойи дуюм насиби хонандаи МТМУ №38 Мадина Мирзоева ва ҷойи сеюм насиби хонандаи МТМУ №51 Азизаи Ҳокимшоҳ гашт.