Дар доираи Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2019 – 2021 бо иқдоми Кумитаи кор бо ҷавонон ва варзиши назди Ҳукумати кишвар барои ҷавонони Вилояти Мухтори Кӯҳистони Бадахшон курсҳои забони англисӣ ва русӣ ба роҳ монда шуданд.

Дар ин бора Сураҷ Чоршанбиев, сардори Раёсати кор бо ҷавонон ва варзиши вилоят иттилоъ дода гуфт, ки ҳоло ба чунин курсҳои бозомӯзӣ зиёда аз 60 нафар ҷавонони маҳаллаҳои Ниводак, Фурӯдгоҳи шаҳр ва ноҳияи Роштқалъа дастрасӣ пайдо намуданд.

Мавриди қайд аст, ки дар Паёми навбатии Пешвои миллат муҳтарам Эмомалӣ Раҳмон ба Маҷлиси Олии мамлакат оид ба масъалаи таълиму тадриси забонҳои русию англисӣ таваҷҷуҳи махсус зоҳир гардида, вобаста ба рушду такмили он ба вазоратҳои маориф ва илм, рушди иқтисод ва савдо, Академияи илмҳо супориш дода шуд, ки дар нимсолаи аввали соли 2019 барномаи нави такмили таълими забонҳои русӣ ва англисиро барои давраи то соли 2030 таҳияву пешниҳод намоянд.