Санаи 1 майи соли ҷорӣ дар доираи «Ҳафтаи ҷавонон» бахшида ба «Соли ҷавонон» дар Донишгоҳи техникии Тоҷикистон ба номи М. С. Осимӣ вохӯрии намояндагони Вазорати маориф ва илми Ҷумҳурии Тоҷикистон, Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо донишҷӯён баргузор гардид.

Меҳмонон дар маросими кушодашавии толори варзишӣ ва ҷамъбасти мусобиқаҳои варзишии байни донишҷӯён, инчунин кушодашавии боғи ҷавонон ва ошхонаи донишҷӯён иштирок намуданд.

Ректори донишгоҳ Одиназода Ҳайдар Одина ҳамаи иштирокчиёнро бахшида ба ҳафтаи ҷавонон шодбош намуда, донишҷӯён ва мураббиёни дастаҳоро, ки дар мусобиқаҳои варзишӣ иштирок намуданд, бо туҳфаҳои хотиравӣ ва ифтихорномаҳо сарфароз гардонид.

Аҳтам Абдуллозода, раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон аз ҳунару истеъдоди донишҷӯён изҳори қаноатмандӣ намуда, донишҷӯёни ихтироъкор ва варзишгар, инчунин ғолибони мусобиқаҳоро, ки ба даври ниҳоӣ роҳхат гирифтанд, бо туҳфаҳо ва сипосномаҳо қадрдонӣ намуд. Сипас миёни раиси Кумита ва донишҷӯён суҳбати озод сурат гирифт.

Дар фарҷоми чорабинӣ сарояндаи хушсадо Зиёвиддини Нурзод бо пешниҳоди чанд суруди тозаэҷоди худ хотири ҳозиронро болида гардонид.

Меҳрубон ИМОМОВА, "ҶТ"