Як гурӯҳи волонтёрон иборат аз 5 нафар бо мақсади баргузор намудани мулоқоту конфронсҳо, аксияҳои экологӣ, баррасии масалаҳои экологӣ дар вилояти Суғд дар доираи Даҳсолаи амал “Об барои рушди устувор 2018 -2028”, ки аз ҷониби СММ бо пешниҳоди Пешвои миллати тоҷик эълон гардидааст, ба вилояти Суғд сафар намуданд.

Баргузории ин силсилачорабиниҳо дар асоси нақша чорабиниҳои Клуби волонтёрони Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо раёсатҳои ҳифзи муҳити зист, кор бо ҷавонон ва варзиш ва мақомоти иҷроияи давлатии вилояти Суғд сурат мегиранд.

Дар Донишгоҳи давлатии шаҳри Хуҷанд ба номи академик Бобоҷон Ғафуров волонтёрон, гирандагони Стипендияи президентӣ ва ҷавонони фаъоли вилояти Суғд гурӯҳи волонтёрони Клуби волонтёрони Кумитаи кор бо ҷавонон ва варзиши назди Ҳукумати Ҷумҳурии Тоҷикистонро бо як самимияти хоса ва меҳмоннавозии тоҷикона пешвоз гирифтанд.

Роҳбари Клуби волонтёрони вилояти Суғд Шодмон Нурматов ҳангоми шиносоӣ афзуд, ки имрӯз дар Раёсати кор бо ҷавонон ва варзиши вилояти Суғд зиёда аз 50 нафар ҷавонони фаъол ба ҳаракати волонтёрӣ машғул гардида, баҳри нафъ расондан ба халқу миллат ва давлату Ҳукумат нақши созгор доранд.

Каримҷон Салимзода, роҳбари гурӯҳи ихтиёриён ба волонтёрон, ҷавонони фаъоли вилояти Суғд барои пешвозгирии гарму самимона изҳори сипос намуда иброз дошт, ки маҳз роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои дӯстиву иттифоқии ҷавонони Тоҷикистон лоиҳаҳои ҷадид ва барномаҳои гуногунро ба роҳ мемонанд, ки ин заминаи мусоиде дар ин самт мегардад.

Шодмон Нурматов гурӯҳи кории волонтёронро ба вилояти Суғд хайрамақдам гуфта, роҳандозӣ намудани чунин барномаҳоро дар минтақаҳои гуногуни кишвар фоли нек номида, изҳори сипос ва минатодории бепоёни худро ба роҳбарияти давлат, махсусан ба Асосгузори сулҳу ваҳдати миллӣ – Пешвои муаззами миллат, муҳтарам Эмомалӣ Раҳмон барои фароҳам овардани фазои оромиву осудагӣ ва иттифоқию дӯстии ҷавонони Тоҷикистон изҳор намуд: “Оромиву осудагӣ ва тинҷию амонӣ моро ба ояндаи дурахшон мебарад ва дӯстии ҷавонони Тоҷикистон ояндаи дурахшони Тоҷикистон аст”.

Имрӯз бо ташаббуси Клуби волонтёрони Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Маҷомоти иҷроияи ҳокимияти давлатии вилояти Суғд, Раёсати ҳифзи муҳити зисти вилоят, Раёсати Донишгоҳи давлатии Хуҷанд ба номи академик Б. Ғафуров, Раёсати кор бо ҷавонон ва варзиш таҳти унвони “ Ҷавонон - нерӯи созандаи Тоҷикистони соҳибистиқло”мизи муддавар баргузор гардид, ки дар он намояндаи мақомотҳои зикргардида, волонтёрон, гирандагони Стипендияи президентӣ ва ҷавонони фаъоли шаҳри Хуҷанд иштирок ва суханронӣ намуданд.

Нахуст, намояндаи Раёсати кор бо ҷавонон ва варзиш меҳмононро хушомадед гуфта иброз дошт, ки Истиқлолияти давлатӣ барои мо - ҷавонон шароити мусоидро дар роҳи омӯзиш ва аз барнамоии илмҳои муосир фароҳам овард ва аз нахустин рӯзҳои ба сари кор омадани Пешвои миллат ҷавонон дар меҳвари сиёсати давлат ва Ҳукумат қарор гирифтанд.

Салимзода Каримҷон иброз дошт, ки Ваҳдати миллӣ ва Истиқлолияти давлатӣ бо талошҳои беназири Пешвои миллат ба даст омадааст, ки мо – ҷавононро лозим меояд, то арзишҳои миллӣ ва давлатиро ҳимоят намоем ва якпорчагии ин марзу бумро ҳимоят намоем.

Рафоҳати Файзалӣ, раиси Шӯрои духтарони Клуби волонтёрон қайд намуд, ки Истиқлолияти давлатӣ барои занону бонувон минбареро ҳадя кард, ки таърих мислашро надидааст ва моро зарур аст, то баҳри баланд бардоштани мақеи занон дар ҷомеа ҷидду ҷаҳд намоем. Занон чароғи зиндагӣ мебошанд ва ин чароғ бояд дар фазои ваҳдат ҳамеша нурафшон бошад.

Нимаи дуюми рӯз гурӯҳи волонтёрон аз дастгоҳи Раёсати кор бо ҷавонон ва варзиш ва утоқи кории волонтёрони вилояти Суғд дидан намуданд. Сардори Раёсати кор бо ҷавонон ва варзиш Олимҷон Зоҳидзода волонтёронро ба вилояти Суғд хайрамақдам гуфта, ташрифи волонтёронро ба вилояти Суғд боиси дӯстии волонтёрони кишвар намид. Сипас, сардори Раёсат бо волонтёрон суҳбат намуда, вобаста ба фаъолияти рушди волонтиёрӣ маслиҳатҳои муфид доданд.

Гурӯҳи волонтёрони Клуби волонтёрони Кумитаи кор бо ҷавонон ва варзиш дар якҷоягӣ бо ҷавонону волонтёрони шаҳри Хуҷанд инчунин аз Осорхонаи миллии шаҳри Хуҷанд дидан намуданд. Онҳо аз осорхона доир ба таърихи миллати тамаддунофару бунёдгузори тоҷик ва лашкаркашиҳо, зулму истибдоли аҷнабиён ба сарзамини Мовароуннаҳр соҳиби маълумоти бештар гардиданд.

Дар асоси далелу исботҳои олимони маъруфи кишвар ва бозёфтҳои таърихӣ, ки рамзи гӯёи таърихи миллати тоҷик мебошанд, бори дигар собит гардидааст, ки миллати тоҷик миллати созандаву бунёдкор буда, бо аҷнабиёну душманони хеш асрҳо мубориза бурда, вале асолати миллии хешро аз даст надодааст. Аз ин рӯ, мо - ҷавононро месазад, ки ин мероси пурарзиши миллати хешро барои ба мерос гузоштан ба насли оянда муҳофизат намоем.

Зимни боздид зикр гардид, ки осорхонаи мазкур яке аз осорхонаҳои машҳур ва қадимаи Осиёи Миёна ба ҳисоб рафта, бо дастгириҳои Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон тармим ва азнавсозӣ шудааст. Он аз ду ошёна иборат буда, дар ошёнаи аввал бозёфтҳои археологӣ, тасвирҳои мусаввирони шинохтаи кишвар бо мармару дигар сангҳои қимматбаҳо оро ёфта, ошёнаи дуюм аз замони сулолаи Ҳахоманишинҳо то замони Истилолиятро дар бар гирифта, дар он бозёфтҳои археологию таърихӣ ҷойгир карда шудаанд.

Бегоҳи 28 июн дар Боғи фарҳангӣ-фароғатии шаҳри Хуҷанд ба номи Камоли Хуҷандӣ бо иштироки васеи ҷавонону волонтёрон аксияи экологӣ баргузор гардид. Ҳамзамон, худи ҳамин бегоҳ дар ҳамин боғ таҳти унвони “Шоми Истиқлол” бо иштироки ҷавонон маҳфили шеър баргузор гардид.