9 - уми октябр Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар доираи сафари корӣ ба шаҳру ноҳияҳои минтақаи Кулоби вилояти Хатлон ва ВМКБ бо имконоту шароити корӣ дар Маркази ҷавонон ва Бахши кор бо ҷавонон ва варзиши ноҳияи Восеъ шинос шуд.

Зимни боздид аз утоқҳои корӣ ва шиносоӣ бо шароити техникиву инфрасохтории Маркази ҷавонони ноҳия, ки Бахши кор бо ҷавонон ва варзиши ноҳия низ дар он қарор гирифтааст, раиси Кумита барои тақвият додани фаъолияти корӣ, истифодаи самараноки утоқҳои муҷаҳҳази омӯзишиву таълимии марказ ба манфиати ҷавонон ва барои ба дараҷаи сифатан нав баровардани фаъолияти соҳаи кор бо ҷавонон ва варзиш дар ноҳияи Восеъ ба масъулин дастуру супоришҳои мушаххас дод.

Ҳамзамон, раиси Кумита дар толори Маркази ҷавонон бо ҳайати фаъоли волонтёрон ва хонандагони курси омӯзишии "Пайравони Пешвои миллат" суҳбат намуда, барои дар оянда беҳтар кардани фаъолияти волонтёрӣ дастурҳои мушаххас дод.