Зери ин шиор 18 июл дар шаҳри Хоруғи ВМКБ Форуми ҷумҳуриявии ҷавонон доир гардид.

Форуми мазкур бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Вазорати корҳои дохилии ҷумҳурӣ ва таҳти сарпарастии президенти Федератсияи футболи Тоҷикистон Рустами Эмомалӣ роҳандозӣ шудааст.
  
Пеш аз оғози форуми мазкур дар назди пояи Парчами давлатии Тоҷикистон дар шаҳри Хоруғ ҳамоиши «Ҷавонон- пайрави Пешвои миллат» баргузор гардид ва меҳмонон аз намоиши дастовардҳо ва ҳунарҳои мардумии ҳунармандони ВМКБ бахшида ба Соли рушди сайёҳӣ ва ҳунарҳои мардумӣ дидан намуданд.

Дар он муовини раиси ВМКБ Гулдаста Орумбекзода, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ризо Назарзода, раиси шаҳри Хоруғ Арамбегим Маҳтобшозода, муовини сардори Хадамоти пешгирии ҳуқуқвайронкунӣ байни ноболиғон ва ҷавонони Вазорати корҳои дохилӣ Зебо Ҷумахонзода иштирок ва суханронӣ карданд.

Зимни баромадҳо таъкид гардид, ки ҷавонони саодатманди тоҷик ба ҳаргуна ҳаракатҳои ифротгарона шомил нашуда, терроризмро маҳкум намоянд ва барои ободӣ ва шукуфоии Ватани маҳбубамон камари ҳиммат банданд.

Дар навбати худ зиёда аз 100 нафар ҷавонони касбу кори гуногун, ки аз гирандагони стипендияи Президентӣ, стипендияи Раиси шаҳри Душанбе, олимон ва муҳаққиқони ҷавон, варзишгарону кормандони соҳаи кор бо ҷавонон, санъаткорону адибон ва ихтиёриёни фаъоли мамлакат иборат буданд, иброз доштанд, ки «мо зери сиёсати сулҳпарваронаи Сарвари давлатамон муҳтарам Эмомалӣ Раҳмон ҳамаи амалҳои номатлуби замони муосирро маҳкум менамоем ва зиракии сиёсиро аз даст надода, барои пойдории истиқлолияти мамлакатамон саъй менамоем».