- Айни замон корхонаи мо дар 56 шаҳру навоҳии кишвар фаъолияти марказҳои хизматрасонии техникиро ба роҳ мондааст, - изҳор дошт зимни нишасти матбуотӣ роҳбари корхонаи «Тоҷикагролизинг» Юсуф Акрамзода. – Марказҳо чун мададрасони деҳқон фаъолият намуда, дар кори кишт ва ҷамъоварии зироатҳои гуногуни кишоварзӣ ҳиссагузоранд.

Ба гуфтаи Ю. Акрамзод «Тоҷикагролизинг» ҷиҳати дастрасӣ ва ба деҳқонон пешниҳод намудани техника ва таҷҳизоти гуногуни соҳаи кишварзӣ бо корхонаҳои ватанӣ ва хориҷӣ ҳамкориро ба роҳ мондааст. Соли гузашта марказҳои хизматрасонии техникӣ ба маблағӣ 15557814 сомонӣ бо техникаю таҷҳизоти гуногун таъмин шудаанд.

Тавре Ю. Акрамзод изҳор дошт, деҳқони тоҷик имрӯз бештар тракторҳои истеҳсоли Белорусро меписандад. Аз комбайнҳои ғалладарав бошад, комбайнҳои «Нива»-и Русияро.

- Ҳоло барои деҳқони тоҷик тракторҳои тасмачархро дастрас дорем, - дар поёни нишаст гуфт Ю. Акрамзод. – Онҳо кайҳо дар интизори ин гуна трактор буданд. Умед аст бо истифодаи ин навъи техника кори деҳқонон боз ҳам осон ва пурсамар хоҳад шуд.

Т. ДАВЛАТ, «ҶТ»