Бахшида 27 – умин солгарди Истиқлолияти давлатии Ҷумҳурии Тоҷикистон мулоқоти якҷояи раиси Кумитаи кор бо занон ва оилаи назди Ҳукумати ҷумҳурӣ Идигул Қосимзода, раиси Кумитаи кор бо ҷавонон ва варзиши назди Ҳукумати ҷумҳурӣ Аҳтам Абдуллозода, намояндаи ваколатдори Президенти Ҷумҳурии Тоҷикистон Мирзо Исмоилзода, раиси шаҳри Ваҳдат Амирзода Раҳмоналӣ ва собиқадори соҳаи хизмати давлатӣ Руқия Қурбонова бо ҷавонону варзишгарон ва фаъолону аҳли ҷамоатчигии шаҳри Ваҳдат баргузор гардид. 

Зимни мулоқот иброз гардид, ки бо талошҳои пайваста, дастгириву ғамхориҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар кишвар суруди сулҳро тифлони наврустаи тоҷик бо оҳангҳои хоси тоҷикона месароянд, ки ин хушбахттарин ва бузургтарин саодати миллат аст.

Зикр шуд, ки ҳоло ҷавонону наврасон дар фазои оромиву осудаи кишвар, дар шароити муосир, дар таълимгоҳҳои ҷавобгӯ ба меъёрҳои ҷаҳонӣ дониш аз худ мекунанд. Пас ҷавонони имрӯзаро лозим аст, баҳри ободкориҳо ва пешрафти ватан саҳмгузор бошанд.

Меҳрубон ИМОМОВА ,"ҶТ"