Дар толори Коллеҷи тиббии шаҳри Хуҷанд ба номи Ю.Б.Исҳоқӣ Конференсияи вилоятӣ таҳти унвони “Насли истиқлолу сулҳу ваҳдатем!” бахшида ба 27-солагии Истиқлолияти давлатии Ҷумҳурии Тоҷикистон доир гардид.

Зимни суханронии иштирокчиёни конфронс гуфта шуд, ки озодиву истиқлол барои ҳар як миллат дастоварди муқаддас ба шумор меравад. Миллати тоҷик дар тӯли садсолаҳо бо ормони давлати мустақили миллӣ зиндагӣ ба сар мебурд ва дар тӯли ин давронҳо ҷони садҳо ҳазор нафар фарзандони содиқу меҳанпарасташро аз даст додааст. Ҳазорҳо шукр, ки имрӯз мо давлати миллии худ - тифли ормонҳо гузаштаи худро дорем ва бо азму талоши мардуми ватандӯст онро аз соле ба соле бо меҳнати созанда ва талошҳои хастанопазир ба ояндаи босаодат раҳнамун месозем. Вале ҳақиқати таърихӣ ва сабақе, ки дар оғози истиқлолияти Ватанамон бардоштем, нишон медиҳад, ки ҳифзи дастоварди истиқлол маротибаҳо аз ба даст овардани он мушкилтар аст.

Дар интиҳо таъкид гардид, ки бояд ҳар як сокини кишвар дар ҳифзу таҳкими истиқлолият саҳмгузор бошаду дар ин росто фаъолияти худро ба роҳ монад. Зеро бузургтарин дастоварди ҳар як миллату давлат маҳз истиқлолият ва сулҳу ваҳдати он мебошад.

Шодмон НУРМАТОВ, “ҶТ”