Имрӯз 20 май дар қароргоҳи Созмони Милали Муттаҳид ҷаласа бахшида ба Рӯзи ҷаҳонии футбол бо иштироки президенти FIFA Ҷанни Инфантино баргузор гардид.

Дар ҳамоиши мазкур Ҷумҳурии Тоҷикистонро намояндаи доимии кишвар дар назди СММ Ҷонибек Ҳикмат намояндагӣ кард.
Зимни суханронӣ таъкид гардид, ки Тоҷикистон яке аз ташаббускорони таъсиси Рӯзи ҷаҳонии футбол мебошад, ки ҳамасола 25 май дар саросари ҷаҳон таҷлил мешавад. Ҳамчунин зикр шуд, ки футбол имрӯз ҳамчун василаи муҳими таҳкими дӯстӣ, ҳамдигарфаҳмӣ ва ҳамбастагӣ миёни халқҳо, бахусус ҷавонон, хизмат мекунад.

Президенти ФИФА Ҷанни Инфантино иштирокчиён ва тамоми дӯстдорони футболро ба муносибати Рӯзи ҷаҳонии футбол табрик гуфта, нақши ин бозиро дар муттаҳид намудани одамон новобаста аз миллат, фарҳанг ва забон муҳим арзёбӣ намуд.

Ӯ ҳамчунин аз ташаббусҳое, ки ба рушди минбаъдаи футбол дар минтақаҳои гуногуни ҷаҳон равона шудаанд, пуштибонӣ кард.
Дар ҳошияи чорабинӣ президенти ФИФА бо намояндагони Тоҷикистон суҳбати самимӣ анҷом дода, ҳамчун рамзи эҳтиром ва дӯстӣ ивази пироҳан сурат гирифт.

Я. МАҲМАДНАБИЕВ, “ҶТ”