Дар соли 2024 дар ҷумҳурӣ 50 иншооти таъминоти фарҳангӣ азнавсозӣ ва сохта ба истифода дода шуданд, ки аз инҳо 4 иншоот дар Душанбе, 4 иншоот дар ВМКБ, 10 иншоот дар вилояти Суғд, 12 иншоот дар вилояти Хатлон ва 20 адад иншоот дар шаҳру ноҳияҳои тобеи ҷумҳурӣ мавриди баҳрабардорӣ қарор гирифтаанд.

Ин нукта 27 январ зимни нишасти матбуотии Вазорати фарҳанги Ҷумҳурии Тоҷикистон баён гардид.

Ба суолҳои хабарнигорон дар мавриди пешниҳоди сурудҳои пастмазмун аз ҷониби як зумра сарояндагони тоҷик тавассути телевизион ва шабакаҳои иҷтимоӣ, ҳамчунин танзими фаъолияти блогерон иброз дошта шуд, ки воқеан ҳам дар замони гузариш ба сохти нави тараққиёт чунин падидаҳо ногузиранд ва яке аз вазифаҳои асосии Вазорати фарҳанг пеш аз ҳама ҳифзу гиромидошти арзишҳои миллӣ мебошад.

Тавре вазири фарҳанг Матлубахон Сатториён иброз дошт, айни ҳол вазорат дар ҳамкорӣ бо дигар идораву ташкилотҳои марбута бо мақсади ҷилавгирӣ аз чунин мушкилот, ба танзим даровардан фаъолияти сарояндагоне, ки дар вазорат сабти ном нашудаанд, ҳамчунин блогерон, тағйиру иловаҳо ба баъзе қонунгузориҳои соҳаи итилоотро ба нақша гирифтааст.

Номбурда дар ин самт баланд бардоштани саводи расонаии ҷомеаро аз муҳимтарин тадбирҳо дар ин самт арзёбӣ намуда, таъкид дошт, ки ҷилавгирӣ аз чунин бенизомиҳо на танҳо вазифаи Вазорати фарҳанг, балки вазифаи ҷонии тамоми аҳли ҷомеа маҳсуб меёбад

Шаҳло ЭШОНОВА, “ҶТ”