22 июл дар нишасти матбуотии ҶСК “Тоҷик Эйр” хабар дода шуд, ки ширкати мазкур пас аз танаффуси тулонӣ фаъолияти худро аз нав оғоз мекунад. Дар ин давра корҳои таъмир ва барқарорсозии парки ҳавопаймоҳо ба роҳ монда шуда, ҳамкориҳо бо ширкатҳои хориҷӣ, аз ҷумла бо Туркия ва Чин оғоз гардидааст.

Назарзода Ҳабибулло, директори Агентии авиатсияи граждании назди Ҳукумати Ҷумҳурии Тоҷикистон изҳор дошт, ки корҳои азнавсозӣ идома доранд ва дар сурати ба миён омадани шикоят, шаҳрвандон метавонанд мустақиман ба ӯ муроҷиат намоянд.

Парвиз Шодмонзода, мудири кулли ширкати “Тоҷик –Эйр” қайд кард, ки сабаби қатъи парвозҳои “Тоҷик Эйр” қарзҳои ширкат буданд, ки феълан ҳалли худро ёфтаанд. Ӯ гуфт, ки нархи чиптаҳои парвоз 20% поин бурда шудааст, то барои мусофирон ва сайёҳон шароити рафтуомади дастрас фароҳам гардад.

Ҳамчунин таъкид шуд, ки ширкат дар оянда ният дорад нархҳоро то 40-45% коҳиш диҳад ва сатҳи хизматрасониро боло барад.

Заррина ҚОСИМОВА, “ҶТ”