Гулзорхон Юсуфзода, ректори Донишгоҳи давлатии Хоруғ (ДДХ) ба номи Моёншо Назаршоев дар нишасти матбуотӣ ба хабарнигорон гуфт, ки соли равон дар донишгоҳ ихтисосҳои нави журналист - тарҷумон, ҳуҷҷатшиносӣ ва таъмини ҳуҷҷатии идора, иқтисодиёт ва идораи сайёҳӣ, таъминоти ҳуқуқии фаъолияти соҳибкорӣ дар корхонаҳои хурду миёна ифтитоҳ гардиданд.

Дар соли таҳсили 2020 – 2021 ҳамагӣ 3681 нафар донишҷӯ ба таҳсил фаро гирифта шуда, инчунин дар зинаҳои таҳсилоти магистратура 127 нафар, аспрантура се нафар ва доктор РhD 12 нафар ба илмомӯзӣ ҷалб гаштанд.

Феълан дар донишгоҳ 13 доктори илм, 56 номзади илм, 129 муаллими калон ва 161 ассистент кору фаъолият доранд.

Муносибатҳои байналмилалии ДДХ низ густариш ёфта, хатмкардагони донишгоҳ дар кишварҳои хориҷӣ, аз ҷумла Руссия, Англия, ИМА, Олмон ва дигар давлатҳо таҳсилро идома дода, соҳиби дараҷаҳои номзад ва доктори илм гардиданд. Ҳамзамон, донишгоҳ бо 10 лоиҳаи гуногуни байналмилалӣ кор карда, дар доираи онҳо дар ДДХ лабораторияву марказҳои илмии нав, аз қабили лабораторияи минерология ва петрография, лабораторияи канданиҳои фоиданок, ГИС - лаборатория, маркази илмӣ – фарҳангии Ҳиндустон, синфхонаҳои инноватсионӣ, лабораторияи эксперименталии экологӣ, Маркази “Интеллект” барои донишҷӯдухтарон, маркази илмӣ - тадқиқотӣ барои донишҷуёни факултети иқтисод ва гармхона дар деҳаи Ҷелондӣ кушода шудааст.