Дар Донишкадаи  давлатии фарҳанг ва санъати  Тоҷикистон ба номи Мирзо Турсунзода бахшида ба ҷамъбасти фестивали ҷумҳуриявии «Ҳафтаи китоби кӯдакону наврасони Тоҷикистон» чорабинӣ дар мавзӯи «Шоирӣ ҳавас нест» баргузор гардид.

Дар он намояндаҳои Вазорати фарҳанги ҷумҳурии Тоҷикистон, Вазорати маориф ва илми ҷумҳурӣ ва Иттифоқи нависандагони Тоҷикистон иштирок доштанд.
Қурбон  Ғуломзода, сардори раёсати рушди муассисаҳои фарҳангӣ-фароғатӣ ва ҳунарҳои мардумии Вазорати фарҳанги ҶТ зимни ҷамъбасти чорабинии мазкур иштирокчиёни озмун ва роҳбарону  мактаббачагонро бо туҳфаҳову сипосномаҳо қадрдонӣ намуд.

Адибон Латофат Кенҷаева ва Азизи Азиз аз шеъру таронахонии кӯдакон изҳори қаноатмандӣ намуда, иброз доштанд, ки кӯдакон ояндаи дурахшони кишвар буда, бояд аз синни хурдсолӣ дар ниҳоди онҳо муҳаббат ба китобу китобхонӣ ва илмомӯзӣ ташвиқу тарғиб карда шавад.

Муҳаммад Ғойиб, Насим Раҷаб, Юсуфҷон Аҳмадзода ва Латофат Кенҷаева бо мукофотҳои Вазорати фарҳанги мамлакат қадрдонӣ карда шуданд.

Садо додани “Гимни фестивал” анҷомбахши чорабиии мазкур гардид.

Меҳрубон Имомова, "ҶТ"