Соли ҷорӣ 307 донишҷӯ аз 12 кишвари хориҷӣ ДДТТ ба номи Абӯалӣ ибни Синоро хатм намудааст.

Дар ин бора Муҳиддин Нуриддин Давлаталӣ, ректори Донишгоҳи мазкур зимни нишасти матбуотӣ хабар дод.

Қайд гардид, ки соли 2025 зинаи ординатураи клиникиро 707 нафар ва интернатураро 201 нафар хатм намуда, соҳиби дипломҳои тахассусӣ шуда, барои фаъолияти пурсамар ва хизмат ба халқу давлат ба муассисаҳои соҳаи тандурустӣ сафарбар гардидаанд.

Дар идома таъкид гардид, ки таҳсилот дар ординатураи клиникӣ ва интернатура зинаи ҳатмӣ ва асосии ихтисосгирӣ ва салоҳияти касбӣ ба ҳисоб мераванд, ки пайваста мукаммал карда мешавад. Аз ҷумла, имтиҳони ординаторони клиникӣ ва интернаҳо бо истифодаи таҷҳизоти муосири тиббии симулятсионии донишгоҳ ба роҳ монда шудааст, ки ба малакаҳои амалии онҳо баҳо дода мешавад. Истифодаи чунин усулҳои муосири таълимдиҳӣ ва баҳодӣ барои баланд бардоштани салоҳиятнокии табибони ҷавон нақши муҳим мебозад.

М. МУҚАДАМОВА, “ҶТ”