“Дар нимсолаи аввали соли 2018 дар кишвар 1301 ҷиноятҳои коррупсионӣ, иқтисодии хусусияти коррупсионидошта ва ҷиноятҳои ба андоз алоқаманд ошкор карда шуд, ки 404 адади он ба гурӯҳи ҷиноятҳои вазнин шомиланд,”- иброз дошт Сулаймон Султонзода, директори Агентии назорати давлатии молиявӣ ва мубориза бо коррупсияи кишвар.

Имрӯз, 1 август дар нишасти хабарӣ бо намояндагони ВАО, Султонзода С. иттилоъ дод, ки аз тарафи кормандони агентӣ дар шаш моҳи соли 2018 дар самти назорати молиявӣ дар вазорату идораҳо ва дигар муассисаҳои буҷетӣ 665 тафтишу санҷишҳои молиявӣ гузаронида, ба маблағи умуми 334,7 млн сомонӣ зарари молиявӣ ошкор гардид, ки аз ин 182,3 млн сонмонӣ ба давлат барқарор карда шуд ва ин нишондод 51,8 фоизи зарари ошкоргардидаро ташкил медиҳад.

Инчунин, гуфта шуд, ки дар вазоратҳо ва сохторҳои маориф ва илм 63 ҷиноят, тандурустӣ ва ҳифзи иҷтимоии аҳолӣ 66 ҷиноят, меҳнат, муҳоҷиарт ва шуғли аҳолӣ 35 ҷиноят, соҳаи бонкӣ 176 ҷиноят, соҳибкорони инфиродӣ 279 ҷиноят ва дигар корхонаҳо дар умум 827 қонунвайронкунӣ ба қайд гирифта шуд.

Гуфта шуд, ки аз ин миқдор ҷиноятҳои ошкоргардида 188 адади онро кормандони мақомоти иҷроияи маҳаллии ҳокимимяти давлатӣ содир намуданд.