8-уми январ дар толори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҷаласаи мушовараи Кумита дар соли 2023 ва вазифаҳо барои соли 2024 доир шуд.

Ҷаласаи мазкур таҳти раёсати Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон баргузор гардида, дар кори он Муҳиддин Пайшанбезода, мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, роҳбарон ва кормандони сохторҳои дастгоҳи марказӣ, ташкилотҳои системаи Кумита, масъулини раёсату бахшҳои кор бо ҷавонон ва варзиши ВМКБ, вилоятҳои Суғду Хатлон, шаҳри Душанбе, мудирони бахшҳои кор бо ҷавонон ва варзиши НТМ, директорони муассисаҳои варзишии кишвар ва марказҳои ҷавонон иштирок намуданд.

Бо ҳамоҳангсозии аъзои ҳайати мушовара тақвими ягонаи чорабиниҳои оммавӣ-варзишӣ, солимгардонӣ ва иштироки варзишгарон дар мусобиқаҳои байналмилалии варзишӣ ва нақшаи маблағгузории он, нақшаи маблағгузории барномаҳои давлатии соҳавӣ дар самти кор бо ҷавонон ва варзиш барои соли 2024 тасдиқ карда шуданд.

Дар идома, Абдулло Раҳмонзода, раиси Кумитаи кор бо ҷавонон ва варзиш ҷиҳати татбиқи пурра ва босамари нақшаҳои тасдиқшуда барои соли 2024 ба масъулин дастурҳои мушаххас дод.

Аз ҷумла, дастур дода шуд, ки бо мақсади иҷрои дастуру супоришҳои Паёми навбатии Пешвои миллат, муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ва дар сатҳи баланд таҷлил намудани ҷашни муқаддаси 35-умин солгарди Истиқлоли давлатӣ аз ҳозир омодагии ҷиддӣ дида, дар тамоми деҳаву маҳаллаҳои ҷумҳурӣ бозиҳои футболу валейбол, шашкаву шоҳмот, тенниси рӯйи миз, бозиҳои миллӣ, гӯштини миллӣ бо усули деҳа ба деҳа, чорабиниҳои гуногуни варзишӣ, хонишҳои сиёсӣ миёни волидайни хонандагони синфҳои 1 то 9, ҷавонони 14-16-сола ва омӯзгорон, инчунин ҷавонони аз 17-сола боло (хонандагони синфҳои 10-11, донишҷӯёни литсейҳои касбӣ ва коллеҷҳо), волидайн ва омӯзгорони онҳо баргузории озмунҳои зеҳнӣ, эҷодӣ, ҳунарӣ ва чорабиниҳои дигари иттилоотӣ-сиёсӣ, конфронсҳо, ҳамоишу мизи муддавар бахшида ба ҷашну санаҳои муҳими миллию давлатӣ миёни ҷавонон доир намуда, инъикоси васеи онро тавассути сомонаҳо таъмин намоянд.

Дар охир Муҳиддин Пайшанбезода, мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа баромад намуда, нишондиҳандаҳои фаъолияти Кумитаро дар соли сипаришуда хуб арзёбӣ намуд ва барои тақвият бахшидани фаъолият дар самти кор бо ҷавонон ва варзиш дастурҳои муфид дод.

А. МУҲАММАД, “ҶТ”