5 ноябр дар доираи сафари расмӣ дар Ҷумҳурии Ӯзбекистон Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ аз шаҳри Тошканд ба шаҳри Бухоро ташриф оварданд.

Дар фурудгоҳи байналмилалии шаҳри Бухоро Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалиро муовини якуми Раиси Сенати Олий Маҷлиси Ҷумҳурии Ӯзбекистон, Ҳокими вилояти Бухоро, Сафири Фавқулода ва Мухтори Ҷумҳурии Тоҷикистон дар Ҷумҳурии Ӯзбекистон ва дигар намояндагони расмӣ самимона истиқбол гирифтанд.

Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустам Эмомалӣ аз ҷойҳои таърихию муқаддаси шаҳри бостонии Бухоро боздид намуданд.

Боздиди муҳтарам Рустам Эмомалӣ дар шаҳри Бухоро аз зиёрати мақбараи Исмоили Сомонӣ ва тамошои Қалъаи Бухоро ҷараён гирифт.

Оромгоҳи сулолавии Сомониён, ки ба асрҳои IX–X тааллуқ дорад, яке аз нодиртарин ёдгориҳои меъмории Бухоро ва тамоми Осиёи Марказӣ ба шумор меравад.

Пас аз анҷоми сафари пурмуҳтавои расмӣ дар Ҷумҳурии Ӯзбекистон, ки тайи ду рӯз идома ёфт, Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустам Эмомалӣ имрӯз аз шаҳри Бухоро ба Ватан баргаштанд.