Дар шаҳри Улан-Батор Чемпионати Осиё оид ба бокс, ки аз 28 март то 11 апрели соли 2026 баргузор гардид, ба анҷом расид. Дар ин мусобиқаи бонуфуз варзишгарони Тоҷикистон бо ҳунари баланд ва иродаи қавӣ баромад намуда, натиҷаҳои назаррас ба даст оварданд.

Дар рақобатҳои финалӣ Парвиз Каримов дар вазни то 90 кило ба финал роҳ ёфта, пас аз муборизаи шадид соҳиби медали нуқра гардид. Ин дастовард яке аз натиҷаҳои беҳтарини ҳайати тими миллӣ дар ин мусобиқа ба ҳисоб меравад.

Ҳамчунин, Миҷгона Самадова ва Некрӯз Салимов бо баромадҳои устувор ва рақобатпазир медалҳои биринҷиро ба даст оварданд ва номи Тоҷикистонро дар арсаи ҷаҳонӣ баланд бардоштанд.

Бо ҳамин, ҳайати тими миллии Тоҷикистон Чемпионати Осиё-2026-ро бо се медал - як нуқра ва ду биринҷӣ - ҷамъбаст намуд.

Бояд гуфт, ки дар ин мусобиқа зиёда аз 230 варзишгар аз 25 кишвари Осиё ширкат варзида, барои дарёфти унвони қаҳрамонӣ мубориза бурданд.