Соли 2024 дар Ҷумҳурии Тоҷикистон 4014 нафар нашъаманд ба қайд гирифта шудааст.

Дар ин бора имрӯз Самад Зафар, директори Агентии назорати маводи нашъаовари назди Президенти Ҷумҳурии Тоҷикистон дар нишасти матбуотӣ иттилоъ дод.

Номбурда иброз дошт, ки аз шумораи 4014 нафар нашъаманд 110 нафари онро занон ташкил медиҳанд, ки дар қайдҳои наркологӣ қарор доранд. Ӯ гуфт, ин нишондод нисбат ба соли 2023, 146 нафар ё 3,5 фоиз коҳиш ёфтааст.

- Дар давраи татбиқи “Стратегияи миллӣ оид ба назорати маводи нашъаовар дар Ҷумҳурии Тоҷикистон барои солҳои 2021-2030” сатҳи нашъамандӣ коҳиш ёфтааст, - зикр кард номбурда.

Инчунин, қайд гардид, ки дар бухории махсуси Агентии назорати маводи нашъаовар бо иштироки комиссияи махсус дар ҳузури намояндагони ВАО 255 кг маводи нашъаовар бо роҳи сӯзонидан нобуд карда шуд.

Бино ба иттилои агентӣ, дар Тоҷикистон ба 100 ҳазор аҳолӣ 40,1 беморони нашъаманд рост меояд.

Фарзонаи УМАРАЛӢ, “ҶТ”