Имрӯз дар Вазорати корҳои хориҷии Ҷумҳурии Тоҷикистон брифинг барои намояндагони ВАО ва корпуси дипломатии муқими Душанбе оид ба Конфронси чоруми оби Душанбе баргузор гардид.

Зимни брифинг иттилоъ дода шуд, ки аз 25 то 28 майи соли 2026 Конфронси чоруми байналмилалии сатҳи баланд оид ба Даҳсолаи байналмилалии амал “Об барои рушди устувор солҳои 2018-2028” дар шаҳри Душанбе доир мегардад.

Гуфта шуд, ки айни замон омодагӣ ба Конфронс бо маром идома дошта, аз ҷониби вазорату идораҳои дахлдори кишвар корҳои зарурии ташкилӣ ва муҳтавоӣ дар сатҳи баланд амалӣ гардида истодаанд.

Интизор меравад, ки Конфронси Душанбе роҳбарон ва намояндагони воломақоми ҳукуматҳо, ниҳодҳои Созмони Милали Муттаҳид, созмонҳои байналмилалӣ ва минтақавӣ, муассисаҳои молиявӣ, доираҳои илмӣ, ҷомеаи шаҳрвандӣ, бахши хусусӣ, ҷавонон ва дигар ҷонибҳои манфиатдорро ба ҳам оварад.

То имрӯз зиёда аз 110 ҳайатҳои расмӣ аз кишварҳои аъзои Созмони Милали Муттаҳид, созмонҳои байналмилаливу минтақавӣ, институтҳои молиявӣ дигар ҷонибҳои даъватшуда иштироки худро дар Конфронс тасдиқ намудаанд.

Ҳамчунин, таъкид гардид, ки Конфронси мазкур ҳамчун платформаи муҳими байналмилалӣ барои таҳкими ҳамкориҳои ҷаҳонӣ дар самти мудирияти устувори захираҳои об, муқовимат ба таъсири тағйирёбии иқлим, ҳифзи пиряхҳо ва пешбурди дипломатияи об хизмат менамояд.

Дар назар аст, ки аз рӯи натиҷаҳои Конфронс се санади муҳими ҷамъбастӣ, аз ҷумла Эъломияи Душанбе, Хулосаи ҳамраисони Конфронс ва Саҳми “Раванди оби Душанбе” ба Конфронси оби СММ дар соли 2026 қабул карда шаванд.

Дар охир, доир ба мавзуъ суолу ҷавоб миёни масъулини чорабинӣ ва рӯзноманигорон сурат гирифт.

Г. КАРИМОВА, “ҶТ”