Имрӯз дар нишасти хабарии Донишкадаи давлатии фарҳанг ва санъати Тоҷикистон ба номи Мирзо Турсунзода аз густариши ҳамкориҳои байналмилалии Донишкада дар нимсолаи якуми соли 2026 хабар дода шуд.

Маҳмуд Назарзода, ректори Донишкада гуфт, ки айни замон донишкада бо 63 донишгоҳу донишкадаи кишварҳои хориҷии дуру наздик созишномаҳои ҳамкорӣ дошта, дар заминаи онҳо ҳамкориҳои илмӣ, таълимӣ ва эҷодӣ ба роҳ монда шудаанд.

Зикр гардид, ки дар шаш моҳи аввали соли ҷорӣ бо мақсади татбиқи созишномаҳои байнимуассисавӣ ва рушди ҳамкориҳои байналмилалӣ устодону кормандон ва донишҷӯёни Донишкада 6 сафари хориҷӣ анҷом додаанд.

Ҳамчунин, дар ин давра ба унвонии Донишкада 38 диплому сипоснома аз натиҷаи иштироки омӯзгорону донишҷӯён дар чорабиниҳои байналмилалӣ ворид гардидааст.

Ба иттилои ректор, ҳоло дар Донишкада 35 нафар донишҷӯи хориҷӣ таҳсил мекунанд. Инчунин, 12 нафар донишҷӯи Донишкада тариқи буҷавӣ дар муассисаҳои таҳсилоти олии хориҷӣ таҳсил дошта, аз ин шумора 9 нафар дар Донишкадаи давлатии фарҳанги Олтой ва 3 нафар дар Донишгоҳи давлатии умумироссиягии кинематография (ВГИК) ба таҳсил фаро гирифта шудаанд.

Гулафшон КАРИМОВА, “ҶТ”