Имрӯз - 5 август зимни нишасти хабарӣ Шамсуло Ҷурахонзода, ректори Донишкадаи давлатии санъати тасвирӣ ва дизайни Тоҷикистон иттилоъ дод, ки айни замон Донишкада бо 25 муассисаи таҳсилоти олии хориҷӣ аз ҷумла Федератсияи Русия, ҷумҳуриҳои Қазоқистон, Ӯзбекистон, Белорус, Арманистон, Гурҷистон, Маҷористон ва дигар кишварҳо созишномаҳои ҳамкорӣ дорад.

Ба гуфтаи ректори Донишкада, дар доираи ин ҳамкориҳо вохӯриҳои корӣ, машваратҳо ва барномаҳои мубодилаи таҷриба баргузор гардида, масъалаҳои густариши ҳамкориҳои минбаъда мавриди баррасӣ қарор гирифтаанд.

Зикр гардид, ки дар шаш моҳи аввали соли 2026 ду нафар донишҷӯи Донишкада ҳамчун ғолибони озмун барои иштирок дар Мактаби байналмилалии зимистонаи “Winter Academy: AI Smart Partnerships (SDG 17)” ба шаҳри Кокшетауи Ҷумҳурии Қазоқистон сафарбар шуданд.

Ҳамчунин, дар доираи барномаи табодули академӣ ду нафар донишҷӯи дигар барои таҳсил ба Донишгоҳи Кокшетау ба номи Абай Мирзахметов фиристода шуданд.

Ба иттилои ректор, айни ҳол дар Донишкада 10 нафар донишҷӯи хориҷӣ аз ҷумҳуриҳои Ӯзбекистон, Қазоқистон ва Афғонистон таҳсил мекунанд. Аз ҷумла, як нафар донишҷӯдухтар аз Ҷумҳурии Исломии Афғонистон тибқи бурсияи таҳсилӣ (квота) ба таҳсил фаро гирифта шудааст.

Гулафшон КАРИМОВА, “ҶТ”