Донишкадаи кӯҳию металлургии Тоҷикистон бо 63 корхонаи саноатӣ шартномаи ҳамкорӣ дошта, дар соли 2026 бо Ҷамъияти саҳҳомии "Комбинати металлургии Тоҷик" ҳам чунин созишнома ба имзо расонид, ки он самти омодасозии кадрҳои соҳаи кӯҳкорӣ ва металлургия, табодули таҷриба, рушди таҳсили дуалӣ, ташкили таҷрибаомӯзии донишҷӯён ва густариши ҳамкориҳои муассисаи таълимӣ бо корхонаҳои истеҳсолиро фаро мегирад.

Дар ин бора Давлат Давлатзода, ректори Донишкада зимни нишасти матбуотӣ ба намояндагони ВАО маълумот дод.

Иброз гардид, ки Донишкадаи кӯҳию металлургии Тоҷикистон ягона Донишкадаи соҳавӣ дар самти саноати кӯҳкориву геология, металлургия ва энергетика ба ҳисоб рафта, аз рӯи 38 ихтисос мутахассис омода менамояд.

Тибқи иттилоъ, дар давраи ҳисоботӣ Донишкадаи кӯҳию металлургии Тоҷикистонро 503 нафар хатм намудаанд. Гуфта шуд, ки бо мақсади дар сатҳи баланд гузаштани давраи таҷрибаомӯзии донишҷӯён Донишкада бо 63 корхонаи саноатӣ шартномаи ҳамкорӣ дорад.

Ҳамзамон, маълумот дода шуд, ки Донишкадаи кӯҳию металлургии Тоҷикистон бо 67 муассисаи илмӣ ва таълимии кишварҳои хориҷии дуру наздик созишномаҳои ҳамкорӣ дорад. Ҳамкорӣ бо муассисаҳои илмӣ ва таълимии Федератсияи Русия, Қазоқистон, Қирғизистон, Узбекистон, Украина, Белоруссия, Словения,Ҷумҳурии Мардумии Чин, Португалия, Молдова ва монанди ин самараи хуб додааст.

Субҳиддин ҚОДИРОВ, "ҶТ"