18-уми август дар ноҳияи Рӯдакӣ таҳти унвони “Истиқлол ва масъулияти шаҳрвандӣ дар шароити ҷаҳони муосир” бо сокинону масъулини ноҳия вохӯрӣ баргузор гардид.

Чорабинӣ бо ибтикори Кумитаи иҷроияи Ҳаракати ваҳдати миллӣ ва эҳёи Тоҷикистон баргузор шуда, дар он Прокурори генералии Ҷумҳурии Тоҷикистон, генерал-полковники адлия Ҳабибулло Воҳидзода, раиси Кумитаи иҷроияи Ҳаракати ваҳдати миллӣ ва эҳёи Тоҷикистон Рудобаи Мукаррам, раиси Кумитаи дин ва танзими ҷашну маросими назди Ҳукумати Ҷумҳурии Тоҷикистон Сулаймон Давлатзода ва раиси ноҳияи Рӯдакӣ Нусратулло Салимзода иштирок ва суханронӣ намуданд.

Қабл аз оғози чорабинӣ меҳмонон аз намоиши ҳунарҳои мардумӣ ва дастовардҳои ноҳияи Рӯдакӣ боздид карданд. Дар намоиш намунаҳои гуногуни ҳунарҳои миллӣ, аз ҷумла сӯзанидӯзӣ, кулолгарӣ, кандакорӣ, бофандагӣ ва дигар навъҳо ба маърази тамошо гузошта шуда буданд, ки таваҷҷуҳи иштирокдоронро ба худ ҷалб намуд.

Раиси ноҳияи Рӯдакӣ Нусратулло Салимзода зимни ифтитоҳи чорабинӣ меҳмононро ба ноҳия хайрамақдам гуфта, иштирокдорони вохӯриро ба муносибати фарорасии 35-солагии Истиқлоли давлатии Ҷумҳурии Тоҷикистон самимона табрик намуд. Номбурда таъкид кард, ки Истиқлол барои мардуми тоҷик арзишмандтарин дастоварди таърихӣ ва заминаи асосии рушди давлатдории миллӣ мебошад. Зикр гардид, ки маҳз дар даврони соҳибистиқлолӣ барои рушди соҳаҳои иқтисодиву иҷтимоӣ, бунёди муассисаҳои таълимӣ, роҳҳо, марказҳои хизматрасонӣ ва дигар иншооти муҳим имкониятҳои васеъ фароҳам омадааст.

Ҳабибулло Воҳидзода, Прокурори генералии Ҷумҳурии Тоҷикистон дар суханронии худ аҳаммияти волоияти қонун, риояи Конститутсия ва дигар санадҳои меъёрии ҳуқуқиро дар таҳкими давлатдории миллӣ ва ҳифзи дастовардҳои Истиқлол таъкид намуд. Ӯ иброз дошт, ки масъулияти шаҳрвандӣ пеш аз ҳама дар эҳтироми қонун, ҳифзи ҳуқуқу озодиҳои дигарон, иҷрои уҳдадориҳои шаҳрвандӣ ва саҳмгузорӣ дар таъмини суботи ҷомеа зоҳир мегардад. Дар идомаи суханронӣ масъалаҳои пешгирии ҷинояткорӣ, махсусан дар байни ҷавонон, мубориза бар зидди экстремизм ва терроризм, пешгирии шомилшавии ҷавонон ба гурӯҳҳои ифротӣ ва истифодаи дурусти шабакаҳои иҷтимоӣ мавриди баррасӣ қарор гирифтанд. Ҳамчунин таъкид шуд, ки дар арафаи ҷашни 35-солагии Истиқлоли давлатӣ ҳифзи сулҳу субот ва дастовардҳои миллӣ вазифаи муқаддаси ҳар як шаҳрванд мебошад.

Прокурори генералӣ дар идомаи суханронӣ аз мавқеи ҷавонон дар рушди давлатдории миллӣ ёдовар шуда, таъкид кард, ки ҷавонон қувваи бузург ва идомадиҳандаи фаъолияти наслҳои имрӯза гузашта мебошанд. Ӯ иброз дошт, ки ҷавонон бояд дар пайравӣ аз фаъолияти пурсамари Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар роҳи ободии ватани маҳбуби худ саҳм гузоранд.
- Шумо ҷанги шаҳрвандиро надидаед. Ин, аз як тараф, хушбахтии шумост. Аммо, аз тарафи дигар, вазифаи шумо ин аст, ки таърихро омӯзед ва донед, ки ин сулҳу субот бо чӣ қимат ба даст омадааст. Пайрави Пешвои миллат будан танҳо унвон нест. Пайрав будан маънои онро дорад, ки ҷавон Ватанашро дӯст дорад, дониш омӯзад, забонҳои хориҷиро аз худ намояд, касбу ҳунар дошта бошад, таърих ва фарҳанги миллиро донад, қонунро эҳтиром кунад, ба падару модар арҷ гузорад, ба ифротгароӣ ва хурофот роҳ надиҳад ва барои ободии Тоҷикистон саҳм гузорад,- илова кард Ҳабибулло Воҳидзода.

Раиси Кумитаи иҷроияи Ҳаракати ваҳдати миллӣ ва эҳёи Тоҷикистон Рудобаи Мукаррам дар суханронии худ доир ба арзиши Истиқлоли давлатӣ, ваҳдати миллӣ ва нақши онҳо дар рушди ҷомеаи муосири Тоҷикистон андешаронӣ намуд.

Зикр гардид, ки Истиқлол танҳо соҳибихтиёрии сиёсӣ набуда, балки масъулияти бузурги шаҳрвандӣ дар назди Ватан, миллат ва наслҳои оянда мебошад. Ӯ таъкид кард, ки ҳар як шаҳрванди кишвар бояд бо эҳсоси худшиносӣ ва худогоҳии миллӣ ба таъриху фарҳанги миллӣ арҷ гузошта, барои ҳифзи арзишҳои миллӣ ва таҳкими ваҳдати ҷомеа саҳмгузор бошад. Номбурда, ҳамчунин, аз аҳаммияти маърифати сиёсиву фарҳангӣ, тарбияи ҷавонон дар руҳияи ватандӯстӣ, эҳтироми арзишҳои миллӣ ва пешгирии таъсири ғояҳои бегона ёдовар шуда, аз иштирокдорон даъват намуд, ки дар татбиқи ҳадафҳои созандаи давлат ва таҳкими фазои сулҳу ваҳдат фаъолона иштирок намоянд.

Таъкид гардид, ки дар шароити ҷаҳонишавӣ ҳар як шаҳрванд, бахусус ҷавонон, бояд дорои ҷаҳонбинии солим, маърифати кофии динию сиёсӣ бошанд, то ба таъсири гурӯҳҳои ифротӣ ва ақидаҳои тундрав дода нашаванд. Инчунин, нақши падару модарон, омӯзгорон, ходимони дин ва фаъолони ҷомеаро дар тарбияи дурусти насли наврас муҳим арзёбӣ гардида, зарурати риояи қонун, эҳтироми арзишҳои миллӣ ва фарҳанги миллӣ таъкид кард.

Дар ҷамъбасти чорабинӣ гуфта шуд, ки дар арафаи таҷлили 35-солагии Истиқлоли давлатии Ҷумҳурии Тоҷикистон ҳар як шаҳрванди кишвар бояд бо дарки масъулияти шаҳрвандӣ барои таҳкими сулҳу ваҳдат, ҳифзи суботу оромӣ, риояи қонун ва ободии Ватан саҳми арзандаи худро гузорад. Иштирокчиён баргузории чунин вохӯрию суҳбатҳои судмандро дар самти баланд бардоштани маърифати ҳуқуқӣ, сиёсӣ, динӣ ва миллии аҳолӣ муҳим арзёбӣ намуда, изҳор доштанд, ки бо меҳнати созанда ва иштироки фаъол дар ҳаёти ҷамъиятӣ барои боз ҳам ободу пешрафта гардидани Тоҷикистони соҳибистиқлол саҳм хоҳанд гузошт.

“ҶТ”