Имрӯз, 4 сентябр дар бинои Кумитаи кор бо ҷавонон ва варзиши назди Ҳукумати Ҷумҳурии Тоҷикистон даври сеюми озмуни ҷумҳуриявии “ТАРАННУМИ ВАТАН” натиҷагирӣ карда шуд.

Даври III озмуни мазкур бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ифтихори 34-юмин солгарди Истиқлоли давлатӣ аз 10-уми июн то 31-уми августи соли ҷорӣ гузаронида шуда, дар он ҳудуди 132 нафар иштирок карданд.

Маросими натиҷагирии даври III озмун бо иштироки 9 нафар аъзои комиссия аз шаш ниҳод - аз ҳисоби намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Иттифоқи нависандагони Тоҷикистон, Иттифоқи рассомон ва дизайнерони Тоҷикистон, Донишкадаи давлатии фарҳанг ва санъати Тоҷикистон ба номи Мирзо Турсунзода, Консерваторияи миллии Тоҷикистон ба номи Талабхӯҷа Сатторов ва Муассисаи давлатии рӯзномаи “Ҷавонони Тоҷикистон” доир шуда, зимни он беш аз 40 навори иштирокчиёни фаъоли озмунро мавриди муҳокима қарор доданд ва барои муайян кардани ғолибон аз рӯйи низоми 100 бала кор гирифтанд.

Дар рафти натиҷагирӣ ҳайати ҳакамон барои аниқ кардани иштирокчиёни фаъоли озмун бо истифода аз низоми 100 бала ба ғайр аз натиҷаҳои шабакаи иҷтимоӣ – саҳифаи фейсбукии рӯзномаи “ҶАВОНОНИ ТОҶИКИСТОН” (писандидан (лайк), тамошои видео (просмотр)), инчунин аз рӯйи меъёрҳои “Маҳорати қироат”, “Сифати навор” ва “Мазмуну муҳтавои шеър” баҳогузорӣ карданд.

Ёдовар мешавем, ки пас аз баҳогузории ҳайати ҳакамон, маросими ҷамъбастии даври III озмуни ҷумҳуриявии “ТАРАННУМИ ВАТАН” рӯзҳои наздик дар шаҳри Душанбе доир гардида, ғолибони он дар доираи як чорабинии бошукӯҳ бо ифтихорномаву туҳфаҳои арзишманд қадрдонӣ хоҳанд шуд.

“ҶТ”