Дар Кохи фарҳанги ба номи Абӯабдуллоҳи Рӯдакии шаҳри Хуҷанд маросими қадршиносии ғолибони озмуни вилоятии “Хомаи созанда-2025” баргузор гардид.

Дар қатори беш аз 40 нафар ғолибони озмун, Субҳиддин Қодиров, хабарнигори рӯзномаи “Ҷавонони Тоҷикистон” дар вилояти Суғд бо Диплом ва мукофотпулии Мақомоти иҷроияи ҳокимияти давлатии вилояти Суғд қадрдонӣ шуданд.

Озмуни "Хомаи созанда-2025" бо ибтикори Мақомоти иҷроияи ҳокимияти давлатии вилоят бахшида ба 34-солагии Истиқлоли давлатии Ҷумҳурии Тоҷикистон ва бо мақсади дастгирии журналистон ва саривақт хабардор кардани ҷомеа аз раванди рушду такомули соҳаҳои мухталифи хоҷагии халқ, шарҳу тавзеҳи воқеъбинона, асосноки дигаргунсозӣ ва проблемаҳои дорои аҳамияти махсуси иҷтимоидошта, ҳамзамон ҷалби таваҷҷуҳи аҳли ҷомеа ба масъалаҳои ҳалталаб миёни журналистон барои беҳтарин маводи журналистӣ эълон гардида буд.

Озмуни вилоятии “Хомаи созанда-2025” аз рӯи номинатсияҳои “Инъикоси дастовардҳои Ҷумҳурии Тоҷикистон ва ҷараёни бунёдкориҳо ба истиқболи 35-солагии Истиқлоли давлатӣ”, “Масъалаҳои марбут ба рушди соҳаи саноат”, “Масъалаҳои марбут ба соҳаи кишоварзӣ”, “Муаррифии дастовардҳои Ҷумҳурии Тоҷикистон дар солҳои соҳибистиқлолӣ (тавассути лавҳаҳои телевизионӣ ва интернетроликҳо)”, “Беҳтарин нашрияи маҳаллӣ”, “Беҳтарин сомонаи расмӣ”, “Беҳтарин наворбардор”, “Беҳтарин суратгир” сурат гирифт.

Ба 42 нафар ғолибони озмун дар бахшҳои гуногун мукофотҳои пулӣ дар ҳаҷми аз 1000 сомонӣ то 6 000 сомонӣ супорида шуд.

“ҶТ”