Имрӯз – 30 октябр дар доираи Нақшаи чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ифтихори 32-юмин солгарди қабули Конститутсияи Ҷумҳурии Тоҷикистон Конференсияи амалӣ - назариявӣ таҳти унвони “Конститутсия – таҷассумгари ормонҳои миллӣ ва кафили ояндаи дурахшони Тоҷикистон” доир гардид.

Дар кори конфронс Раҳмизода Шабнам, муовини аввали раиси Кумитаи кор бо ҷавонон ва варзиш, Саидзода Изатулло, директори Маркази миллии қонунгузории назди Президенти Ҷумҳурии Тоҷикистон, Қувватзода Фотеҳ, судяи Суди конститутсионии Ҷумҳурии Тоҷикистон, Искандарзода Исломиддин, омӯзгори кафедраи ҳуқуқи судӣ ва назорати прокурории факултети ҳуқуқшиносии Донишгоҳи миллии Тоҷикистон ва донишҷӯёни муассисаҳои таҳсилотӣ олӣ иштирок намуданд.

Тавре масъулини чорабинӣ иброз доштанд, ҳадафи асосии баргузории конференсия баланд бардоштани маърифати конститутсионӣ ва ҳуқуқии ҷавонон, шарҳу тавзеҳи аҳамияти Конститутсияи Ҷумҳурии Тоҷикистон дар таҳкими давлатдории миллӣ, тарғиби эҳтиром ба қонун ва таҳкими ҳисси масъулияти шаҳрвандии насли ҷавон мебошад.

Конститутсия ҳамчун санади олии ҳуқуқӣ барои ҳифзи ҳуқуқу озодиҳои инсон ва шаҳрванд заминаи ҳуқуқӣ фароҳам оварда, эҳтиром ба он яке аз шартҳои муҳими таҳкими қонуният ва тартиботи ҳуқуқӣ дар ҷомеа мебошад.